Jeltzaleen kudeaketa: EAJren ustez, altxor; EH Bilduren arabera, kalte
EAJk azken urteotan egindako kudeaketa mintzagai izan dute zenbait alderdik, 2015eko udal eta foru hauteskundeetako kanpainaren hirugarren egunean; jeltzaleak harro agertu dira egindako lanagatik eta oposizioko talde nagusienak haien kontra egiteko erabili du, hain justu.
Hala, Unai Rementeria Bizkaiko ahaldun nagusi izateko hautagai jeltzaleak ziurtatu egin du EAJK ez dituela "promesarik" eskaintzen, baizik eta "ekintzak". Gaineratu duenez, maiatzaren 24an herritarrek aukeratu egin beharko dute besteek eskaintzen dituzten "esperimentuen" eta jeltzaleen "lanaren" artean.
Lekeition egindako hauteskunde-ekitaldi batean, Rementeriak positibotzat jo du "EAJren eguneroko lana jarduera ekonomikoa eta kalitatezko enplegua sustatzeko, ideien, proiektuen eta ilusioaren bidez".
Horren ildotik gogoratu duenez, jeltzaleek lortu dute "PCBk 20 milioi euro inbertitzea Sestaoko lantegi berri batean eta kalitatezko 200 lanpostu sortzea Ezkerraldean eta Bizkaian; Gestampek Boroan egitea nazioarte mailako formakuntza zentroa, TysenKrupp enpresak Zamudion egitea I+G zentroa; Alstomek lantegi berri bat egitea Ortuellan; Lointekek ere planta berri bat egitea Bilboko Portuan; eta Bizkaian 2.319 langabe gutxiago egotea".
EH Bildu
Josu Unanue EH Bilduren Bizkaiko ahaldun nagusirako hautagaiak salatu duenez, EAJren kudeaketa "interes sozialaren kaltetan" izan da eta, gaineratu duenaren arabera, Bizkaiko Diputazioak "zenbait enpresaren interesen mesedetan jardun du".
Unanue Bermeon izan da (bertan alkateorde kargua izan du legealdi honetan), eta azpimarratu du EH Bilduk Bermeon utzitako arrastoa Batzar Nagusietara eta Diputaziora ere heldu behar dela.
"Gardentasuna eta zintzotasuna dira gure jarduera politikoaren zutabeak. Aspaldi hala izan zen, eta orain ere bada", esan du. Horren ildotik, ezinbestekotzat jo du herritarren parte hartzea, ordezkari politikoek interes sozialaren alde egin dezaten.
"Herritarrok garaileak izan gaitezen, ez da nahikoa zenbaitek gure mesedetan jardungo dutela esatea. Erabaki politikoak, halabeharrez, herritarren ondoan hartu behar dira", erantsi du.
PP
Juan Carlos Cano Gipuzkoako ahaldun nagusi izateko hautagaiaren esanetan, bere alderdiak ez du onartuko "Gipuzkoak Bizkaiko jaia ordaintzen jarraitzea, minutu bat gehiago ere".
Donostiako Aquariumaren aurrean, Canok ziurtatu du Ekarpenen Legea aldatzea eskatuko dutela "bidegabea eta neurrigabea" delako "ez da gure lurraldearen tamainaren ez pisuaren araberakoa, eta bi urte daramatza luzapenekin Bizkaiko Foru Aldundiaren betoagatik". "Gipuzkoarrok dagokiguna ordaindu nahi dugu, eta ez Bizkaia finantzatu", gaineratu du.
Canoren hitzetan, ez dute onartuko "bidegabekeriarik lurraldeek kutxa komun horretara egiten duten ekarpena itzultzean". "Ikusi behar izan ditugu Tapia eta Oregi sailburuak, EAJkoak, esanez gure azpiegiturek itxaron zezaketela, eta bitartean, Bizkaian denok ordaindutako azpiegituren eta inbertsioen inaugurazioetan, irribarretsu zeuden".
PSE-EE
Idoia Mendia PSE-EEren idazkari nagusiak "lantaldeak, estatus berriak eta banderak alde batera uztea" eskatu dio EAJri, "arazo errealei aurre egin eta konpontzeko". Mendia Carlos Totorika Bizkaiko ahaldun nagusirako hautagaiarekin eta Luis Felipe Finker Sestaoko alkategaiarekin batera izan da Sestaon.
Gainera, bere alderdiaren aldeko botoa eskatu du "etxebizitza benetako eskubidea izan dadin eta ez aberatsen ondasun esklusiboa". Mendiaren iritzian, jeltzaleek "sozial-kristauarenak egin, baina mozorroa kendu dute".
Mendiak hitza hartu du Sestaon egindako ekitaldi batean, Carlos Totorika Bizkaiko ahaldun nagusi izateko hautagaiarekin eta Luis Felipe Finker bertoko alkategaiarekin batera.
Ahal Dugu
Bestalde, Ahal Dugu Valderejo Arabako parke naturalean izan da gaur, igandea, ingurumenaren defentsaren aldeko neurriak aurkezteko eta frackingaren (haustura hidraulikoa) aurkako "erabateko oposizioa" adierazteko.
Ahal Dugu alderdiko hautagaien arabera, fracking-ak "gai kutsakorrak isuri ditzake atmosferara, lurpeko urak pozoitu, seismoak eragin, eta pertsona animalia eta landareei kalte egin".
Irabazi
Irabazi Alternatiba Errepublikarra, Equo, Ezker Anitza-IU eta independenteak batzen dituen ekimen sozio-politikoak bere egin ditu Errepublika eta udalerrien izaera "ezaugarri" gisa.
Irabaziko kideek hauteskunde-ekitaldia egin dute gaur, igandea, Amaia Martin Donostiako alkategaiarekin eta Arantza Gonzalez Gipuzkoako ahaldun nagusi izateko hautagaiarekin batera. Bertan esan dutenez, Irabazi "Errepublikak ordezkatzen duen askatasunean, berdintasunean, elkartasunean eta laizismoan oinarritzen da", eta ziurtatu dute "kalean eta erakundeetan" defendatuko dituztela.
Besteak
Gorka Maneiro UPyDren legebiltzarkide eta bozeramaileak ziurtatu duenez, bere alderdiaren helburua "bai Donostian, bai Gipuzkoan agintzen duen mafia kentzea" da, "demokrazia birsortzeko neurri" gisa eta "duintasuna erakundeetara bueltatzeko".
Zure interesekoa izan daiteke
PSN, Zurekin Nafarroa eta EH Bilduri deia egin die Geroa Baiko Koldo Martinezek, akordiora heltzeko
Nafarroan, hauteskunde orokorrek bete-betean baldintzatutako negoziazioei buruz ezer gutxi eman dute ezagutzera oraingoz alderdiek. Gobernuaren osaketan eta Iruñeako Alkatetzan, ikusteko dago nola jokatuko duten Nafarroako sozialistek.
Garrido: 'Argi dago parte-hartze txikiak kalte egin digula'
Pilar Garridok parte-hartze txikia deitoratu du, bere koalizioari zuzenean eragiten diola argudiatuta.
Andueza: 'Euskadi sozialistagoa da gaur, ezkerrera gehiago begiratzen du'
Eneko Anduezak positibotzat jo ditu PSE-EEk hauteskunde hauetan lortutako emaitzak, eta Euskadi sozialistagoa dela eta ezkerrera begiratzen duela esan du.
Iturgaiz: 'PPren menpe badago, ez da Bilduko alkaterik edo ahaldun nagusirik izango Euskadin'
Carlos Iturgaizek positibotzat jo ditu PPk Euskadin eta Espainian lortutako emaitzak, eta ez dela Bilduko alkaterik edo ahaldun nagusirik egongo ziurtatu du.
Egibar: 'Argi dago zerbait ez dugula ondo egin'
Joseba Egibarrek EAJk Gipuzkoan lortutako emaitzen balorazioa egin du. Egibarrek adierazi du argi dagoela EAJk zerbait ez duela ondo egin.
EH Bildu alde nabarmenarekin garaile Gipuzkoako Batzar Nagusietan
Ezker abertzaleko koalizioak 22 eserleku bereganatu ditu Batzar Nagusietan (bost gehiago), EAJk 17 (hiru gutxiago), PSE-EEk zazpi (bi gutxiago), Elkarrekinek bi (bi gutxiago) eta PPk hiru (bi gehiago). Parte-hartzea % 59,92koa izan da, 2019an baino ia zazpi puntu gutxiago.
Otegi: 'Ziklo aldaketa baten lehen urratsa eman da'
EH Bildu nagusitu da udalerri askotan eta Gasteizen indar bozkatuena da 7 zinegotzirekin, duela lau urte baino bat gehiago
EAJk irabaziko luke Bilbon eta Donostian; EH Bilduk, Gasteizen; eta berdinketa teknikoa Iruñean
Nafarroako Parlamentuan, UPN izango litzateke bozkatuena, 12-13 eserlekurekin, baina PSN gertu egongo litzateke, 10-11rekin, eta Gobernuari eutsi ahalko lioke, egungo formula berarekin.
18:00etako parte-hartze datua: % 54,12 Nafarroan eta % 48,52 EAEn
Parte-hartzea % 1,19 igo da Nafarroan 2019ko hauteskundeekin alderatuta, eta % 4,84 jaitsi da EAEn.
Berezitasun ugariko hauteskundeak dira Udal hauteskundeak, Euskadiko bost udalerritan bereziki
Usansolon, Gernikan (Bizkaia), Irunen (Gipuzkoa) eta Arabako Errioxako Bastidan eta Guardian, adibidez, berezitasun ugariko hauteskundeak izango dira gaurkoak; jakin ezazu zergatik bideo honetan.