Administrazio Orokorreko lehen enplegu plana onartu du Jaurlaritzak

Eusko Jaurlaritzaren Gobernu Kontseiluak Euskal Autonomia Erkidegoko Administrazio Orokorreko lehen Enplegu Plana onartu du gaur, langileria gaztetzeko, emakumeen eta gizonen arteko berdintasuna lortzeko eta bitartekotasunarekin amaitzeko.

Aipaturiko planak lehentasunezko hiru helburu finkatu ditu epe motz edo ertainera: langileria gaztetzea eta bitarteko langile funtzionarioen lanpostuak finkatzea, emakumeen eta gizonen arteko berdintasuna lortzea eta lanpostuak herri-administrazio elektronikoaren eta teknologia berrien ondorioz sortutako premietara moldatzea.

Langileria gaztetzeko eta finkatzeko helburuz, Eusko Jaurlaritzak lekualdatze-lehiaketa bat egitea, Administrazio Orokorrean urteak daramatzaten bitarteko langileentzat enplegua finkatzeko prozesu bereziak martxan jartzea eta lan eskaintza publiko bat egitea proposatu du.

Eusko Jaurlaritzak emandako datuen arabera, gaur egun Euskadiko Administrazio Orokorrean lanean ari diren gehienak emakumeak dira, baina horietako gehienek bere prestakuntza-mailaren azpitik dauden lanpostuak betetzen dituzte eta, gainera, emakume gehiago daude bitarteko postuetan. Aipaturiko desberdinkeriak saihesteko, Eusko Jaurlaritzak Euskadiko Administrazio Publikoaren Berdintasun Plana eguneratuko du.

Gainera, Eusko Jaurlaritzak funtsezkotzat jotzen du gobernuaren egitura teknologia berrien eta herri-administrazio elektronikoaren ondorioz sortutako premien arabera eguneratzea eta berrantolatzea. Horretarako, egitura osatzen duten lanpostuen zerrenda eguneratzea proposatzen du.

Gaur egungo langileen erradiografia

Eusko Jaurlaritzak Euskadiko Administrazio Publikoan lanean diharduten funtzionario eta bitarteko funtzionarioen 5.564 lanpostuen gainean egindako azterketaren ondorio da gaur onartutako lehen Enplegu Plana.

Langileen batez besteko adina 50,84 urtekoa da, eta gaur egun Administrazio Orokorrean lan egiten duten pertsonen % 68,51 2015 eta 2031 bitartean erretiratuko da. Aintzat hartzen baditugu epe horretan buruzagitza postuetarako zenbatetsi diren erretiroak, % 78,09raino igotzen da ehuneko hori. Bestalde, bitartekotasun-tasa % 35,48 inguruan kokatzen da, eta gehiago eragiten die emakumeei. Buruzagi eta teknikari lanpostuei erreparatzen badiegu, % 43,12raino goratzen da bitartekotasun-tasa.