Niño Becerra: "Udan 100 gastatzeko asmoa zuenak, gasta ditzala 80, udazkena zaila izango baita"
Santiago Niño Becerra ekonomialariak Radio Euskadiko Boulevard saioan gaur goizean egindako elkarrizketan onartu duenez, "zaila da sei hilabetetik haragoko aurreikuspenak egitea". Orain aurreikuspen guztiak egiteko oinarri hartzen da Ukrainako tentsioak oraindik hilabete batzuez iraungo duten ustea; halere, "bihar akordio bat sinatuko balitz, aurreikuspena aldatu egingo litzateke, bai, baina inflazioak handia izaten jarraituko luke, erregaien prezioak ere bai, hornidura faltak jarraituko luke, bai eta zenbait elikagairen prezioaren igoerak ere".
Horrek guztiak, noski, eragin nabarmena izango luke herritarrengan: "Ekonomialarien artean beti esaten dugu inflazioa pobreen zerga dela. Horrelako igoerak daudenean, biztanleriaren erosteko ahalmena jaitsi egiten da", dio.
Ulertzen du herritarrek hartu duten carpe diem dinamikarako joera; "Bi urtez murrizketekin egon gara, eta, orain, jendeak mugitu nahi du, irten nahi du". Baina bere gomendioa argia da: "Biztanleriak ez du pentsatzen udazkenean zer datorren, udaz gozatu nahi du, beharbada 'azken uda' izango dela pentsatua. Hala ere, esango nieke 100 gastatzeko asmoa bazuten, 80 gastatzeko eta 20 gordetzeko udazkenerako, udazkena eta negua oso zailak izango baitira".
Egoerari aurre egiteko hainbat arlotan hartzen ari diren neurriak kritikatu ditu Niño Becerrak, gizartean gero eta desberdintasun gehiago eragiten duten neurriak direlako.
Alde batetik, Europako Banku Zentralak interes-tasak igo izanak "pertsona eta enpresa txiki eta ertainei arazoak ekarriko" dizkiela uste du. Helburua kontsumoa geldiaraztea bazen, bere ustez "askoz eraginkorragoa izango zen BEZa igotzea", ekonomia txikientzat ez delako horren kaltegarria.
Era berean, "akats ikaragarria" deritzo Espainiako Gobernuak elektrizitatearen BEZa jaisteari eta erregaiak diruz laguntzeari; izan ere, "kafea denentzako" horrek "mesede bera egiten dio paketeak banatzen ari den garraiolari txiki bati, zein eguna bere Ferrarian paseatzen ematen duenari". Bere ustez, neurriak kolektibo eta sektore kalteberak babestera bideratu behar ziren, modu orokorrean planteatu beharrean.
Halaber, eszeptiko agertzen da Errusiari jarritako zigorren inguruan: "Grazia egiten didate albiste horiek. Orain esaten dute erosten dugun gas gramo bakoitzarekin Errusiako armada finantzatzen ari garela. Eta nor ari ginen bada finantzatzen otsailaren 24a baino lehen? Orain arazo bat da, baina lehen mundu guztiari oso ondo iruditzen zitzaion Errusiari gasa erostea, merkea zelako". Bere iritziz, ondorioak kontuan hartu gabe hartu dira neurriak.
Gasaren kontsumoa murriztu beharko dela uste du, Europan, udazkenean eta neguan "egongo dena baino gas gehiago beharko delako". Baina kontsumoa murriztuko bada ere, "gasaren prezioak gora egingo du, AEBri erosiko diogun gas likidotuak Errusiako gasa baino askoz garestiagoa baita".
Albiste gehiago ekonomia
Espainiako Gobernuak baztertu du aireportuen kudeaketa osorik Euskadira transferitzea
Diario Vasco egunkariak argitaratu duenez, Eusko Jaurlaritzak erabaki estrategikoetan iritzia eman ahal izatea proposatu du Espainiako Gobernuak, baina eskualdatzea osorik egitea baztertu du, Estatuaren eskumen esklusiboa delako.
Azkoitiko Juaristi eta Aitek enpresetako langileek bizi duten "egoera jasanezina" salatu dute
Orain urtebete inguru lehertu zen lan-gatazkaren berri emateko, agerraldia egin dute bi enpresetako langileek. Uste dute zuzendaritzak "ezkutuko itxiera plan bat" duela. 130 lanpostu eta hainbat familia "arriskuan" daudela salatu dute.
Lodosako Karey Solanok konkurtsoa egingo du, eta lantegia itxi eta 36 beharginak kaleratuko ditu
Langile gehienak oso aspaldi hasi ziren lanean, eta batez beste 50 urtetik gorakoak dira. CCOOk salatu du oraindik ez dutela abuztuko nomina jaso.
Ostiralean sei hilabete beteko dira Gasteizko lorezainek grebari ekin ziotenetik, eta manifestazioa deitu dute egun horretarako
Gaur goizean Gasteizen egindako prentsaurreko batean, Enviser enpresako langileek "borrokarekin jarraitzeko" asmoa agertu dute, "soldata duinak lortu arte". Gainera, langileak akordiorako prest agertu dira, baina hori lortzeko "Gasteizko Udalaren benetako inplikazioa" beharrezkoa dela uste dute.
Zeintzuk dira BBVAren eskaintza berriaren gakoak?
Josu Ferreiro EHUko irakasleak Radio Euskadin egin duen elkarrizketa batean adierazi duenez, erakundeak Kataluniako bankuko akziodunen zati handi batek eskatzen zuenera egokitu du bere proposamena, lehen eskaintzari uko egin baitzioten, nahikoa ez zelakoan. Ferreirok zehaztu duenez, BBVAk ez du eskudirutan ordainduko, akzio propioetan baizik, eta horrek abantaila fiskala dakarkie akziodunei, zergak gutxiago ordaintzea dakarrelako. Mugimendu horrekin, Carlos Torres Vila buru duen bankuak Sabadellen akzioen merkatuko balioa berdindu du, eta horrek opak aurrera egiteko aukerak areagotu ditu, nahiz eta BBVAri berari kostu handiagoa ekarri. Hobekuntza berri bat egon litekeen galdetuta, ekonomialariak uste du zaila dela: "BBVAk argudiatu zuen Sabadellen akzioak gainbaloratuta zeudela. Orain, alde hori desagertu egin da. Beste eskaintza bat baztertu beharko litzateke, hau izango litzateke azkena", adierazi du. Elkarrizketa Boulevard saioan entzun daiteke, GUAUn, 02:50: 00etatik aurrera (jatorrizkoa, gaztelaniaz).
2026an jarriko da martxan Petronorren eta OCO Technologyren agregakin sintetikoen planta, Bilboko Portuan
Proiektua 2024an hasi zen eraikitzen, eta Europa kontinentalean agregakin sintetikoak fabrikatuko dituen lehen lantegi industriala izango da. Agregakin horiek CO2 gasa harrapatzen dute, bai ekoizpen prozesuan zehar, baita horien bizitza baliagarrian ere.
BBVAk % 10 igo du Sabadell bankua eskuratzeko eskaintza
Carlos Torres BBVAren presidenteak azpimarratu duenez, hobekuntza eginda "aparteko eskaintza" jarri dute Banco Sabadellen akziodunen esku, "balorazio eta prezio historikoarekin, eta bi bankuen batasunarekin sortutako aukera apartan parte hartzeko aukerarekin". Sabadellek, bere aldetik, erantzun du azken eskaintza "jatorrizkoa baino okerragoa" dela.
Maderas de Llodio, greba mugagabean
Langileen batzordeak salatu du enpresak produkzioaren % 40 beste lantegi batzuetara eramateko asmoa duela, eta deslokalizazioak Laudioko eta eskualdeko "lantegiaren etorkizuna arriskuan jartzen" duela.
Multiverse Computingek % 30 handituko du bere lantaldea Donostian
Software kuantikoan eta adimen artifizialean espezializatutako enpresa donostiarrak datorren urtean 60 pertsona kontratatzea aurreikusten du. 4 langile zituztela abiatu zuten konpainia 2019an, eta 260 izango dira laster.
Pentsiodunak Euskadiko hiriburuetan manifestatu dira gutxieneko pentsioak LGSarekin parekatzea eskatzeko
Ehunka pertsonak bat egin dute Gasteizen eta Donostian Euskal Herriko Pentsiodunen Mugimenduak deitutako manifestazioekin; hain zuzen ere, osteguneko Legebiltzarreko bozketan presioa egiteko, gutxieneko pentsioak Lanbide arteko Gutxieneko Soldatarekin (LGS) parekatzea eskatzeko.