Euskal partzuergoak Ayesa Digital erosi du

EAEko inbertitzaileen partzuergoak Ayesa Digitalen erosketa itxi du astearte honetan, 480 milioi euroren truke, eta Iñigo Ucin presidente ez-exekutibo eta Manuel Baraza kontseilari delegatu ariko dira konpainian.

Indar Karterak, BBK-k, Vitalek eta Tekneik osatzen duten partzuergoak Ayesa Digital, Ayesa ingeniaritza-enpresaren dibisioaren erosketa itxi du, agintariek onetsita.

Erosteko akordioa duela hiru hilabete lortu zen, in extremis, 2025eko azken egunean. Otsailaren 10ean, Vital Fundazioa batu egin zen partzuergora; Kutxa, aldiz, ez.

Iñigo Ucin (Mondragon Korporazioaren presidente ohia) sartu da Ayesa Digitalen presidente ez-exekutibo gisa. Kontseilari delegatu berria, aldiz, Manu Baraza izango da; 25 urte baino gehiagoko esperientzia du teknologiaren arloan, eta hainbat zuzendaritza-kargutan ibili da, bai Ibermatican, bai Ayesan.

Bi izendapenak Ayesa Digitaleko lehen Administrazio Kontseiluan berretsiko dira, apirilaren erdialdean.

Erosketa "Ayesa Digital Europako zerbitzu digitalen hornitzaile nagusietako bat izateko hazkunde-fase berri baten" hasiera da, eta "hazkunde handiko sektore estrategiko baten aldeko apustu irmoa, irtenbide digital aurreratuena, enpresa-ehunaren eraldaketan, garapenean eta lehiakortasunean funtsezkoa", adierazi du partzuergoak ohar batean.