"Egun hauetako ohiko jarioa" Iberian, lurreko laguntza zerbitzuko langileek deitutako bigarren greba egunean

Iberiako lurreko laguntza zerbitzuko langileek deitutako bigarren greba egunak % 15,9ko jarraipena izan du larunbat honetako 18:30 arte, aire-konpainiak jakinarazi duenez. Horren arabera, "egun hauetako ohiko jarioa" gailendu da, Gabonetako azken egunean.

Konpainiak ohar batean azaldu duenez, aireportu guztietan betetzen ari dira gutxieneko zerbitzuak, eta ordura arteko puntualtasuna % 77koa izan da (ohi baino atzerapen gehiago izan dira, beraz), Ipar Atlantikotik itzultzeko hegaldietan izandako "eguraldi txarraren" ondorioz.

Enpresak adierazi duenez, Iberia Taldeak (Iberia, Iberia Express eta Air Nostrum) 456 hegaldi programatu ditu larunbaterako, eta horietatik 317 arazorik gabe irten dira 18:30erako.

Halaber, ostiral goizean Bilboko hegaldietan kargatu ez ziren maletak errepidez eraman zituzten arratsaldez, eta guztiak iritsi dira euren helmugara. Bartzelonan ere, hurrengo hegaldietan eraman zituzten falta ziren maleta guztiak, eta azken helmugara bidean daude.

Dena dela, larunbat goizean hainbat arazo izan dira Kanaria Handian, eta, ondorioz, lehen hegaldietan ezin izan dituzte maletak eraman. Beraz, "konpainiak ekipaje horien bidalketak antolatu ditu hurrengo hegaldietan, bezeroek ahalik eta lasterren jaso ditzaten".

UGTk eta CCOOk, berriz, Iberia salatuko dutela iragarri dute, Bilboko aireportuan geratu ziren maletak "errepidez garraiatzeko azpikontratak erabiltzeagatik".

Iberiako iturrien arabera, gaur 10:30 aldera grebak % 66ko jarraipena izan du Euskadin, eta atzo bidali gabe geratu ziren maleta guztiak helmugetara iritsi dira azkenik.

Lehen greba egunean

Lehen greba egunak, ostiralekoak, % 75eko jarraipena izan zuen Bilboko aireportuan, konpainiaren esanetan. Sindikatuek, berriz, % 90era igo dute datua, gutxieneko zerbitzuak eman behar izan ez zituzten langileen % 100ek bat egin baitzuten grebarekin, horien arabera. Oro har, bi ordurainoko atzerapenak izan ziren atzo Loiuko aireportuan, eta zenbait hegazkin maletarik gabe aireratu ziren.

Konpentsazio ekonomikoak

FACUA kontsumitzaileen elkartetik gogorarazi dute bidaiariek ordain ekonomikoak jasotzeko eta aldaketa horrek beren planetan eragin dituen gastuak ordaintzeko eskubidea dutela, baina adierazi dute airelineak ez daudela behartuta konpentsazio horietako bat ere ordaintzera, baldin eta ezeztapena gutxienez bi aste lehenago iragarri bada.

Konpentsazioak 250 eta 600 euro bitartekoak izango dira, bertan behera utzitako hegaldiak egin beharko lukeen distantziaren arabera, eta erdira murriztuko dira, aire-konpainiak bidaia egiteko lau ordutik behera iraungo duen garraiobide alternatibo bat eskainiz gero.