Euskadiko anbulantziak greba mugagabera joango dira, enpresek eta Jaurlaritzak konponbiderik eman ezean

ELAk, LSB-USOk, LABek, UGTk, CCOOk eta ESK-k iragarri dutenez, Euskadiko garraio sanitario azpikontratatuan urtarrilaren 8tik 21era deitutako 15 eguneko grebaren ondoren enpresa esleipendunek eta Eusko Jaurlaritzak "ez badute inolako irtenbiderik edo mugimendurik" erakusten, "otsailean greba mugagabera joateko erabakia hartuta eta mahai gainean dago".

Iragarpena ostiral honetan egin dute, Osasun Sailak Bilbon duen ordezkaritzaren aurrean anbulantzietako langileek egin duten kontzentrazioan. Ondoren Eusko Jaurlaritzaren egoitzaraino manifestazioa egin dute.

Hedabideei egindako adierazpenetan, Ruben Espina ELAko ordezkariak baieztatu du sindikatuek greba mugagabera joatea adostu dutela, "ez baitakagu, gaur-gaurkoz, erabaki hori birplanteatzera eraman gaitzakeen ezer".

Sindikatuen aldarrikapen nagusia da zerbitzu hori ematen duten langile azpikontratatuen baldintzak eta Osakidetzak zuzenean kontratatutako eta "funtzio berak" betetzen dituzten langileen baldintzak homologatzea, lanaldiei, soldatei, lizentziei, bajei eta norberaren aukerako egunei dagokionez, besteak beste.

Espinak ziurtatu duenez, "ez da onargarria" "halako garrantzia duen" zerbitzu publiko batek azpikontratatuta jarraitzea, eta "diru publikoarekin negozioa egiten duten enpresak egotea", "erabiltzaileek eta langileek kudeaketa txarraren eta baliabide faltaren ondorioak pairatzen dituzten bitartean".

Sindikatuek adierazi dutenez, astelehenean hasitako lanuzte berri honen jarraipena % 99koa izan da, ezarritako gutxieneko zerbitzuak betetzera behartuta ez dauden langileen artean. Larrialdietan % 100ean ezarri zituen Jaurlaritzak gutxieneko zerbitzuak.

Protestaren hasieran, ELAko ordezkariak baieztatu du sindikatuek ez dutela oraindik "inolako jakinarazpenik" jaso, ez patronalaren aldetik negoziazioan aurrera egiteko, ezta Eusko Jaurlaritzaren erantzunik ere, zerbitzu hori azpikontratatuta egon ez dadin egindako eskariari dagokionez. 

"Zerbitzu honekin beste autonomia erkidego batzuetan gertatzen ari dena" kontuan hartzeko eskatu dio Eusko Jaurlaritzari; izan ere, "zenbait erkidegoetan aldaketak egiten ari dira jada eta langileak Osasun Zerbitzu Publikoen mendeko langile izatera pasatzea pentsatzen ari dira. Osakidetza bezalako zerbitzu garrantzitsu batean gauza bera egitea litzateke logikoena". 

Horren ildotik, Eusko Jaurlaritzak egoera honetan duen erantzukizuna azpimarratu du Espinak, "ez duelako bere erantzukizuna bere gain hartzen, eta gatazkak aurrera egingo duela esaten jarraitzen dugu. Hiru hilabetez hainbat greba egin ondoren, hilabete honetan beste 14 greba egun egingo ditugu".

Langileek hitzarmena blokeatuta dute duela bi urtetik, eta, azpimarratu dutenez, erosteko ahalmenaren galera % 20 ingurukoa izan da.