Diru publikoz eraikitako etxebizitzek "izaera publikoari eutsiko diote betiko", Sanchezek iragarri duenez

Pedro Sanchez Espainiako Gobernuko presidenteak etxebizitzaren alorrean dagoen egoera "kritikoari" aurre egiteko neurri sorta iragarri du gaur. Guztira, 12 neurri jarriko ditu exekutiboak, hiru arlo handitan: etxebizitza publiko gehiago eraikitzea; araudia zorroztuz, publikoa dena gehiago babestea, eta etxebizitza erosteko, alokatzeko edota zaharberritzeko laguntza gehiago ematea.

Gainera, aurreratu duenez, diru publikoz eraikitako etxebizitzek "izaera publikoari eutsiko diote betiko", eta iragarri du horrela izan dadin lege mekanismo bat jarriko duela. Era berean, neurrien artean, erabaki da Etxebizitzaren Estatu Enpresa Publikoak lehentasuna izan dezan lurzorua edo etxebizitzak erosteko.

"Etxebizitza: ongizate estatuaren bosgarren oinarria" foroa egin dute gaur Madrilen, eta horren itxiera ekitaldian egin ditu iragarpenak Sanchezek. Dena dela, ikusteke dago nola eragingo dien EAEri eta Nafarroari, erkidegoen esku baitago etxebizitzaren eskumena.

Zehaztu duenez, Espainiako Gobernuak Sarebeko (Banku Berregituratzearen ondoriozko Aktiboak Kudeatzeko Sozietatea) 3.300 etxebizitza eta bi milioi metro karratuko bizitegi-lurzorua transferitu dizkio enpresa publiko berriari, etxebizitza publikoak eraikitzeko.

Ildo beretik, urteko lehen seihilekoan 30.000 etxebizitza sartuko dira enpresa publiko horretan, eta horietatik 13.000 berehala egingo dute. Sanchezek berretsi du Espainiak etxebizitza publikoen parkea handitu behar duela (gaur egun, guztizkoaren % 2,5 da), eta Europaren azken muturrean dagoela (% 14 da Frantziako Estatuan eta % 34 Herbehereetan).

Era berean, alokairu soziala bultzatzeko hainbat neurri egongo dira. Berme publikoko sistema bat sortuko dute, jabeak eta maizterrak babesteko, lehenengoek "bermeekin eta arriskurik gabe" alokatu dezaten. Sanchezen arabera, sistema Frantzian "arrakasta handiarekin" probatutakoaren antzekoa da. Helburua da hutsik dauden lau milioi pisuak mugiaraztea, 400.000 inguru tentsionatuetan, alokairuaren merkatura itzul daitezen. Neurria aurten jarriko da martxan, eta 35 urtetik beherakoei alokatzen dieten jabeei aplikatuko zaie.

Era berean, alokairu eskuragarrirako etxebizitza hutsak birgaitzeko programa berri bat jarri ahal izango da martxan. Laguntzak emango zaizkie etxebizitza bat gutxienez 5 urtez modu onean alokairuan jartzeko berritzen duten pertsonei.

Bestalde, Espainiako Gobernuak % 100eko salbuespena proposatu du pertsona fisikoen errentaren gaineko zergan (PFEZ), etxebizitzak erreferentziako indizearen arabera alokairuan jartzen dituztenentzat.

"Airbnb ostatuak sobera daude, etxebizitzak falta dira"

Iragarritako beste neurrietako batek pisu turistikoen merkatuan esku hartzea izango du helburu, Sanchezen arabera, etxebizitzaren arazoaren parte baitira. "Airbnb etxeak sobera daude eta etxebizitzak falta dira", azpimarratu du.

Zentzu horretan, iragarri du Kongresura zerga erreforma bat eramango duela, etxebizitza turistikoak negoziotzat hartu eta jarduera ekonomiko gisa tributatzera pasa daitezen.

Gainera, Espainiako Estatuan bizi ez diren EBtik kanpoko atzerritarrek etxebizitza erostea mugatuko du Espainiako Exekutiboak, "erosiz gero ordaindu beharko duten karga fiskala higiezinaren balioaren %100era arte handituz".