Indakeria gutxiago EAEn 2013an, baina lapurreta gehiago etxebizitzetan

Kriminalitateak % 1,4 egin du behera aurtengo lehen bederatzei hiletan. Jaitsiera are handiagoa izan da indarkeria erabiliz egindako delituei dagokienez (% 25,4), baina etxeetan indarra erabiliz egindako lapurreten kopuruak goranzko joerari eutsi dio (% 17,3).

Gaur Barne Ministerioak 2013ko lehen bederatzi hiletan izandako delituei buruz zabaldutako datuek diotenez, urtarril eta irail artean 68.600 arau-hauste penal (delituak eta faltak) egin ziren Euskadin, joan den urteko denbora tarte berean baino ia 1.000 gutxiago (69.544 izan ziren orduan).

Oro har, indarkeria erabiliz egindako delituak jaitsi egin dira: % 25,4 gutxiago izan dira, eta lapurreta gutxiago ere egin dira indarkeria eta larderia erabiliz (% 29,7 murriztu dira horiek). Kalte delituen kopurua % 15,8 jaitsi da, eta droga trafikoarekin lotutakoena % 10,2.

Aitzitik, indarra erabiliz % 4,6 lapurreta gehiago egin dira, batik bat etxeetan (% 17,3ko igoera), eta ebasketak % 4,3 gutxiago izan dira.

Hilketei dagokien atalean, urtarril eta irail artean hamar izan direla dio txostenak, iazko lehen hilabetean bezainbeste.

Jaitsiera, Araban eta Gipuzkoan

Kriminalitatea Araban jaitsi da gehien urtea hasi zenetik: % 5,8. Gipuzkoan ere jaitsi da (% 3,4); Bizkaian, ostera, gora egin du delinkuentziak: % 0,7 handiagoa izan da.

Araban eta Gipuzkoan delitu biolento gutxiago izan dira, % 29 eta % 29,2 hurrenez hurren, eta are jaitsiera handiagoa izan da beherakada indarkeria eta larderia erabiliz egindako lapurreten artean: ia % 36 Araban eta % 40 baino gehiago Gipuzkoan.

Bizkaian, indarkeriaz egindako delituen zenbatekoa ez da horren modu nabarmenean jaitsi (% 24 baino gutxiagoG), eta indarkeria erabiliz egindako lapurreta kopurua ere gainerako lurraldeetan baino gutxiago jaitsi da (% 27,1).

Gainera, indarrez egindako lapurretak Bizkaian igo dira gehien: % 18,3. Araban, % 3,2 igo dira, eta Gipuzkoan, aldiz, jaitsi (% 8,2).

Estatu osoan, kriminalitatea % 3,2 jaitsi da, eta beherakada % 12ra heldu da hilketen kasuan. Etxebizitzetan indarrez egindako lapurretak, aldiz, igo egin dira (% 3,6).