Maskara derrigorrezkoa izango da Nafarroan aste honetatik aurrera

Aste honetatik aurrera maskara janztea derrigorrezkoa izango da Nafarroan, Foru Gobernuak gaur arratsaldean iragarri duenez. Azken orduotan atzeman dituzten COVID-19aren agerraldiak eten eta kutsatzeak ekiditea da helburua.

Osasun Departamentuak zabaldutako ohar batean jakitera eman duenez, 34 kasu berri atzeman dituzte Nafarroan azken 24 orduetan. "Egonkortu egin da Tuterako ezkontzak eragindako fokua baina areagotu egin da Iruñean sanferminetako gosari batekin lotutako agerraldia" eta "gutxienez beste hiru foku" ere atzeman dituzte.

Azken horietako bat Estellerrian izan da, eta kutsatutakoen kontaktuak bilatzen eta PCR testak egiten ari dira jada.

Testuinguru horretan, eta pandemia beste autonomia erkidegoan nola ari den garatzen ikusita, Osasun Departamentua "barne kontsulta tekniko bat amaitzen ari da maskara derrigorrez erabili beharrari buruz", eta aste honetan eskatuko dio Nafarroako Gobernuari neurria indarrean jartzea, "birusaren transmisioa eragozteko", ohar horren arabera.

Prestatzen ari diren proposamen horretan, "espazioak, isunak, epeak eta abar" zehaztuko dituzte.

Gobernuak ohartarazi duenez, kutsatze berriak "topaketa sozial eta familiartean gertatzen ari dira", "asko jaitsi da kutsatuen batez besteko adina" eta ekainaren amaieratik zortzi agerraldi zenbatu dituzte jada.

Dena dela, egoera honek "ez du oraindik ospitaleetako egoeran ezta hildakoen kopuruan joera aldaketarik eragin", Nafarroako Gobernuaren esanetan.

Une honetan, 14 pertsona daude herrialdeko ospitaleetan, horietako bat ZIUn.

Pandemia hasi zenetik, berriz, 528 pertsona hil dira.

Euskal Autonomia Erkidegoan Ordizian bakarrik da derrigorrezkoa maskara

Beste agerraldi bat, Ordiziakoa, izan da EAEn horrelako lehen neurria ekarri duena. Jada 73 kutsatu dituen fokua dela eta, Ordizian maskararen erabilera derrigorrezkoa izatea erabaki zuen Eusko Jaurlaritzak aste honetan.

Oraingoz, neurri hori Goierriko herri horretan bakarrik aplikatzen da. Bertan, beharrezkoa da maskara janztea espazio publiko guztietan, 1,5 metroko tartea gordetzeko modua izan ala ez.

Maskara, derrigorrezkoa da edo izango da Katalunian, Balear Uharteetan, Extremaduran, Aragoin, Andaluzian eta Errioxan

Espainiako Estatuan, ostegunean sartu zen indarrean maskara kalean nahitaez erabili beharra Katalunia osoan. Etxetik irteten direnetik, herritarrek maskara jantzita izan behar dute, eta, bestela, 100 euroko isuna ezarri ahal diete. Koronabirusaren berragertze masiboek eraman dute Generalitatea neurri hau hartzera. Larrienak, Segriakoak (Lleida), kontrolik gabe jarraitzen du, eta gaur 00:00etatik aurrera, konfinamendua gogortuko dute eta debekatu izango da Lleida hiriburuan, Alcarrasen, Aitonan, Serosen, Sosesen, La Granja d'Escarpen, Massalcoreigan, Torres de Segren zein Suchsen eta Raimaten sartzea edota horietatik ateratzea.

Larunbateko 00:00etan sartu zen neurria indarrean Extremaduran ere, eta astelehenetik aurrera maskarrak derrigorrezkoak izango dira Balear Uharteetan.

Gainera, Aragoiko Gobernuak ere maskara beti jantzi beharra dagoela onartuko du astelehen honetan, eta gauza bera egingo dute astelehen eta astearte bitartean Errioxan eta Andaluzian ere.

Asturias, Kantabria eta Murtzia ere neurri hori indarrean sartzea pentsatzen ari dira.