Abian da Errigora 2021 kanpaina, Nafarroako produktuak erosiz euskara bultzatzeko

Gaur abiatuko da Errigora 2021 kanpaina, Nafar hegoaldeko uzta euskarari puzka izenpean. Gaurtik hasita eta azaroaren 11ra bitarte izango da Nafarroan ekoitzitako produktuez osatutako saskiak eskatzeko aukera, eta horien balioaren % 25 Nafarroa hegoalde eta erdialdeko euskalgintza hauspotzera bideratuko da.

Errigora elkarteak abian jarritako urteroko kanpaina da, AEK, Ikastolen Elkartea edo Sortzen bezalako eragileen babesarekin, besteak beste. Nafarroako 25 ekoizlek landutako elikagaiez osatutako saskiak saltzen dituzte, euskararen inguruan lanean ari diren eragileentzat dirua jasotzeko xedearekin. Aurten, "herriak egiten du herria" leloa izango du kanpainak.

Euskal herritarren elkartasuna beharrezkoa dela gogorarazi du Errigorak, zonaldean AEK-k eta ikastolek euskaldunak sortzen jarrai dezaten eta Sortzenek sare publikoan D eredua indartzeko lan egin dezan, baita Agerraldia egitasmoak Nafarroa hegoalde eta erdialdean euskararentzako aro berri bat ireki dezan ere.

Hiru saski mota egongo dira erosleen eskura: saski beltza, Errigoraren klasikoa (55€), saski berdea, ekologikoa (65€), eta saski zuria (75€), berezia. Horiek eskatu edo erosteko, 700 salmenta-puntu izango dira Euskal Herriko herri ugaritako taberna, denda, ikastola, udaletxe zein euskaltegietan. Gainera, egunotan, 200 herri baino gehiagotan ibiliko dira ehunka auzolangile kanpainaren berri ematen edo eskaerak jasotzen eta, horiek egiteko sasoia bukatuta, kutxak banatzen. Edonola ere, eskariak online egiteko aukera ere izango da.

Eskariak egiteko epea gaur hasi da, eta "iazko arrakasta berdindu edo gainditzea" espero dute koordinatzaileek. Izan ere, aurreko edizioa inoizko arrakastatsuena izan zen, 16.800 saski saldu baitzituzten.

Kanpaina abiatzeko, gaur goizean zehar Euskal Herri osoko dozenaka lagun bilduko dira Ablitas Nafarroa Garaiko herrian. Auzolana medio, salgai izango diren saskiak osatuko dituzte.

Arratsalderako, 3.000 lagun bilduko dituen kontzertua antolatu du Errigora elkartearen menpeko Agerraldia taldeak Tuterako zezen-plazan. Rotten XIII, Brigade Loco eta Unidad Alavesa taldeek 18:15etatik aurrera joko dute.

Guztira, 300 boluntariotik gora arituko dira bertan lanean; Ibil Bedi taldeak Agerraldia ekimenerako sortutako kantuak dioenez, "geuk egiten ez badugu, ez baitu inork egingo".

Agerraldia eta aurtengo kanpaina

Duela bi urte jaio zen Agerraldia mugimendua, Nafarroako euskararen aldeko eragileak batuta. Aldaketaren zain denbora gehiegi joan zitzaienaren ustean eta "herritarrok ekarri ezean, helduko ez dela sinetsita" sortu zuten.

Bere garaian erromatarrek ager vasconum izendatu zuten eremua berreuskaldundu nahi duten herritar guztiak saretzea eta mugimendu ekintzaile bat sortzea dute helburu. Izan ere, "bokazio praktikoa" du Agerraldiak: egiteko eta eginarazteko sortu da; "instituzioen utzikeriaren edo, are, eragozpenen aurrean, herri-ekimena nagusitu dadin, euskararentzat aro berri bat zabaltzeko".

Errigorako Peru Aranbururen hitzetan, pandemia dela eta, "jendarteari begira" aurten egin du lehen ikasturtea egitasmoak, eta "horrek eman duena kontatzeko aukera ona izango da aurtengo kanpaina".

Aurreikuspenak aldekoak dira, asteotan ekimena antolatzen duten taldeekin izandako harremana erreferentzia gisa hartuta. Parte hartu duten bitartekoek ere "sare sozialetan zabaldu dituzte" aurtengo kanpainaren nondik norakoak eta albisteak.

Ekarpen ekonomikoak "euskarari bultza berri bat emateko eta euskarazko ekimenak antolatzeko" erabiliko dira. Halaber, espero dute kanpainak "2022ko agenda askoz potenteagoa izateko" balio izatea.

Herrigintza ariketa

Errigoratik adierazi dutenez, ekimenaren ibilbide laburra "herrigintza ariketa ederra izan da, herriak herriari eginiko ekarpen xume bezain inspiratzailea". 2013tik 1.400.000 euro baino gehiago bideratu dituzte Nafarroa hegoaldean eta erdialdean "euskaldunak sortzeko herritik jaiotako egitasmoak sustengatzera".

Era berean, diru-ekarpen hori sortzeko bidea "elikadura-burujabetzara pausoak emateko" baliatu dute. Bide horretan, "herrilana" izan dute lanabes.

Proiektutik diotenez, "herritarrak kontsumitzaile edo erabiltzaile huts bihurtu garen garaiotan, auzolanaren balioa eta baliagarritasuna frogatu dugu".