Oviedoko Auzitegiak 20-22 urteko kartzela zigorrak ezarri dizkie Javier Ardinesen hiltzaileei
Oviedoko Auzitegiak 20 eta 22 urteko kartzela zigorrak ezarri dizkie Javier Ardines Llanesko (Asturias) IUko zinegotziaren hilketagatik errudun jotako lau gizonei. Ardines 2018ko abuztuaren 16an hil zuten, Asturiasko bere etxetik gertu.
Pedro N. eta Djilali B. eta Maamar K. auzipetuei jarri diete zigorrik handienak: 22 urte. Lehenengoak, zornotzarra sortzez, hilketa agindu zuela ebatzi zuen herri epaimahaiak, eta beste biek hilketa gauzatu zutela. Jesus M.ri, bitartekari lanetan ibilitakoari, 20 urteko zigorra ezarri dio Auzitegiak.
Epaiketa azaroan egin zuten Oviedoko Lurralde Auzitegian, eta 18 saioren ostean, lau gizonak errudun jo zituen herri epaimahaiak, aho batez.
Kartzela zigorraz gain, biktimaren familiak jaso beharreko kalte ordaina zehaztu du Auzitegiak: Ardinesen alargunari eta seme-alabei 400.000 euro eman beharko dizkiete (200.000 euro alargunarentzat eta 100.000 euro bi semeetako bakoitzarentzat).
Pedro N.ren kasuan, erailketa delituaren bultzatzaile izateagatik zigortu du epaileak. 22 urteko kartzela zigorraz gain, zaintzapeko askatasuna ere ezarri dio. Hala, bost urtean ezingo da Ardinesen familiarengana 100 metro baino gutxiagora egon eta ezingo da eurekin harremanetan jarri.
Jesus M.ri dagokionez, erailketa delituaren ezinbesteko laguntzailetzat jo du Auzitegiak. Pedro N.k bezala, espetxetik ateratakoan bost urtez zaintzapeko askatasunean egon beharko du, eta ezingo da biktimaren familiarengana hurbildu edo harekin hartu-emanetan jarri.
Djilali B. eta Maamar K. auzipetuei erailketa delitua egotzi diete, egile gisa. Kartzelatik irtetean, gainerako zigortutakoen baldintza bertsuak ezarriko dizkiete bost urteko epean.
Epaia ez da irmoa eta helegitea aurkez daiteke Asturiasko Justizia Auzitegi Nagusiko Arlo Zibileko eta Zigor Arloko Salan; 10 eguneko epea dago horretarako.
Albiste gehiago gizartea
Oñatiko Larraña Etxeak 20 nazionalitateko 100 errefuxiatu hartzen ditu
Zentroa kudeatzen duen Zehar-Errefuxiatuekin elkarteak salatu du Erregelamenduaren erreforma berriak nazioarteko babesa eskatzen duten pertsonak "zigortzen" dituela. 3.000 pertsonak baino gehiagok eskatu dute nazioarteko babesa Euskadin aurten.
Bittor Arginzonizen Etxebarri erretegiak munduko bigarren jatetxe onena izaten jarraitzen du
Peruko Maido jatetxea munduko onena izendatu dute The World 's 50 Best Restaurants 2025 sarietan. Bestalde, Etxebarri erretegiko Mohamed Benabdallah aljeriarra munduko sommelier onena izendatu dute.
Abadia Saria jaso du Gure Zirkuak
Gure Zirkuak aurtengo Abadia Saria jaso du gaur arratsaldean, Arrateko gainean (Eibar) egindako ekitaldian, komunitate oso bati “elkarrekin euskaraz bizi eta sentitzeko plaza berritzailea” eskaintzeagatik. Eider Mendoza diputatu nagusiaren eskutik jaso dute Abadia Sariaren oroigarria –Iñigo Aristegui Telloren Zazpi Petaloak eskultura– Gure Zirkuko kideek.
Musika, nagusi: EAEko 10 kultur ekitalditatik hiru musikari lotutakoak dira
6.342 kontzerturekin, musika euskal agendan gehien agertzen den forma kultural gisa finkatu zen iaz. Ondoren antzerkia (4.239 ekitaldi) eta, urrunago, zinema/ikus-entzunezkoak (2.349) eta dantza (860).
EAEko kultur ekitaldien ia erdiak euskarazkoak edo elebidunak dira
2024an programatutako kultur ekitaldien % 32,8 euskara hutsean izan ziren, eta % 13,1 elebidunak, gaztelaniarekin edo beste hizkuntza batekin batera.
EAEko kultur sarea: bizia, baina asimetrikoa
2024an, ia 20.000 ekitaldi inguru erregistratu ziren hiru lurraldeetan, Kulturklik atariaren arabera. Beste era batera esanda: egunean, batez beste, 55 kultur saio izan ziren EAEko udalerrietan.
Kultur programazioa urte osoan zehar ereiten da EAEn, baina udazken-negua da sasoirik emankorrena
Orokorrean orekari eusten zaion arren, eskualdeen arteko aldeak egon badaude. Eremu batzuetan programazioa batik bat uda sasoira bideratzen dute, eta beste batzuetan, aldiz, ekitaldiak hilez hil sakabanatzen dituzte.
Beskoitzek ikastola berria izango du 2026-2027 ikasturtean
Egun dauden prefabrikatuetatik gertu, lursail bat erosi du Beskoitzeko Udalak eta bertako zati bat ikastolarentzat izango da. Herri Urratsen lortutako diruari esker eta Euskal Herri osotik iritsitako elkartasunari esker, Seaskak milioi bat euroko inbertsioa egingo du. Irailean lanak hasiko dira, eta hurrengo ikasturtean hasiko lirateke Beskoitze aldeko 50 haur inguru baldintza duinetan euskaraz ikasten.
Ehgamek Bilbao Bizkaia Harro ekimena boikoteatzeko deia egin du
EAJk Harrotasunaren Nazioarteko Eguna “bereganatu eta turistifikatu" nahi duela salatu du eta E28 Koordinadorak ekainaren 28rako deitutako manifestazio “herrikoi eta aldarrikatzailera” joateko deia egin du.
500 ekitalditik gora antolatu dituzte 2025eko sanferminetarako
Ostegun honetan aurkeztu dute sanfermin jaien egitarau ofiziala, eta iragarri dutenez, hilaren 14an Sorotan Bele talde gipuzkoarrak emango dio amaiera bederatzi eguneko zoramenari, Gazteluko plazako agertokian.