Aurrekoetan baino jende gehiago hurbiltzen ari da hautetsontzietara EHUko errektore berria aukeratzeko

EHUk hurrengo sei urteetan erakundea gidatuko duen errektorea izendatzeko hauteskundeak ditu astearte honetan. Unibertsitate Sistemaren Lege Organikoa aplikatuz (44.3 artikulua), agintaldiak, lehen aldiz, sei urteko iraupena izango du. Epe hori luzaezina izango da eta agintaldia, berriztaezina.

16 urtean lehen aldiz, bi hautagai  —Eva Ferreira egungo errektorea eta Joxerramon Bengoetxea Zuzenbidearen Filosofiaren katedraduna— izango dira lehian. Hauteskunde kanpaina zalapartatsua izan da oso, eta dimisio bat ere izan da tartean. Guillermo Quindos Ferreiraren 'bigarrenak' kargua utzi behar izan zuen, sare sozialetan Bengoetxearen kontra botatako irainak zirela eta. 

Bi hautagaiek goizean eman dute botoa euren fakultateetan: Ferreirak, Bilbon; eta Bengoetxeak, Donostian. Biek ala biek botoa emateko deia egin diete hautesle guztiei. Oraingoz, azken datuen arabera, ikasleen artean, aurreko edizioetan baino jende gehiago ari da botoa ematen. Ikasleek haien burua entzunaraztea nahi dute, eta arazoak konpontzeko irtenbideak eskatu dituzte.

50.590 pertsona daude hautetsontzietara deituta. Horien artean daude lotura iraunkorra duten 2.326 irakasle doktore; irakasle ez-doktoreen eta lotura iraunkorrik ez duten 1.649 irakasle eta ikertzaile doktore; 1.801 gainerako irakasle eta ikertzaile; 42.837 ikasle, eta kudeaketa eta administrazio eta zerbitzuetako langile teknikoen 1.977 langile.

Unibertsitate-komunitateak botoa emateko eskubidea modu zuzen, aske, sekretu eta haztatuan erabiliko du. Horrek esan nahi du boto bakoitzaren pisua aldatu egiten dela hauteslearen kolektiboaren arabera:

- Lotura iraunkorra duten irakasle doktoreak: % 56,25

- Lotura iraunkorra duten irakasle ez-doktoreak eta lotura iraunkorra ez duten irakasle eta ikertzaile doktoreak: % 8

- Beste irakasle eta ikertzaileak: % 1,59;

- Ikasleak: % 22,08

- Kudeaketa eta Administrazio eta Zerbitzuetako teknikariak: % 12,08.

Prozesuaren antolaketa

Hauteskunde-mahaiak 09:00etan zabaldu dituzte, eta 18:00ak arte dago botoa emateko. Irakasleek eta ikasleek beren ikastetxeetan emango dute botoa, eta Kudeaketako eta Administrazioko eta Zerbitzuetako teknikariek campuseko hiru errektoreordetzetan eta Bilboko Ingeniaritza Eskolan (San Mames) eta Ekonomia eta Enpresa Fakultatean (Sarriko).

Guztira 99 hauteskunde-mahai osatu dira, eta eskuzko 1.000 hautestontzi baino gehiago izango dituzte. 242.000 boto-paper eta 65.000 gutun-azal inprimatu dira. Horiek guztiak birziklatzeko jasoko dira.

Gainera, EHUko hainbat fakultatek eta eskolek Ikastegiko Batzarrerako hauteskundeak egingo dituzte: Hezkuntza, Filosofia eta Antropologia Fakultateak, Hezkuntza eta Kirol Fakultateak (Egoitzaren Batzordea eta Atalaren Batzordea ere aukeratuko dituzte), Farmazia Fakultateak, Letren Fakultateak, Lan Harremanen eta Gizarte Lanaren Fakultateak (Egoitzaren Batzordea eta Atalaren Batzordea ere aukeratuko dituzte), Bilboko Ingeniaritza Eskolak eta Gasteizko Ingeniaritza Eskolak.

Hauteskundeen emaitzak

Aurreikuspenen arabera, 20:30ean, Bizkaia Aretoko Mitxelena gelan, EHUko idazkari nagusi Aitor Zurimendik, Hauteskunde Batzordeko idazkari gisa, errektorearen hautaketaren behin-behineko emaitzak emango ditu, jendaurreko agerraldian. Harekin batera, Joxerramon Bengoetxea eta Eva Ferreira hautagaiak egongo dira, eta adierazpenak egingo dituzte. Ekitaldia streaming bidez jarraitu ahal izango da.

Agerraldi ofiziala egin arte ez da espero hauteskunde egunaren nondik norakoen daturik aurreratzea.

Funtsezko hautua

Errektore hautatuak unibertsitateko autoritate akademiko gorena hartuko du bere gain, hurrengo sei urteetan euskal erakunde publikoaren kudeaketan eta zuzendaritzan funtsezko zeregina izango duelarik.