Espetxera bidali ditu epaileak Irunen aurkitutako gorpuaren kasuarekin lotura dutelakoan atxilotutako biak

Irungo Epaitegiak espetxera bidali ditu asteazkenean Gipuzkoako udalerri horretako etxebizitza batean hilik aurkitu zuten gizona hil zutelakoan atxilotutako bi gizonak, Eusko Jaurlaritzako Segurtasun Sailak jakinarazi duenez.

Ertzaintzak eskaera egin ondoren, eta gorpua topatutako tokian bi pertsona horiek gertakariarekin lotzen zituen ebidentziak aurkituta, Calafellen (Tarragona) atxilotu dituzte. Ertzaintzak Irungo epaileen esku utzi eta hark espetxera bidali ditu.

ETBk jakin duenez, atxilotuetako bat biktimaren pisukidea zen. 

Ertzaintzaren ikerketei esker, ustezko bi egileak aurkitu eta atxilotu dituzte Calafellen (Tarragona). Lehenengoa udalerri horretako Udaltzaingoak atxilotu zuen, eta bigarrena, Esquadra Mossoek.

Ikerketa asteazken arratsaldean hasi zen, Irunen, 17:15ean: kriminalitate zantzuak zituen gizon baten gorpua aurkitu zuten etxe batean. Biktima lurrean erorita zegoen, gela batean.

Irungo ertzain-etxeko Herritarren Babeserako agenteak bertaratu ziren eta, ondoren, Ikerketa Kriminaleko Gipuzkoako Lurralde Zerbitzuak bere gain hartu zuen kasua.

Segurtasun Sailak jakinarazi duenez, ardura zuen lantaldeak gertakarien inguruan egindako ikerketei esker, denbora gutxian identifikatu dituzte indarkeriazko heriotza horren egileak omen diren bi gizonak. Erailketa-delitua izan omen da.

Ertzaintzak pertsona horiek bilatzeko abisua eman zuen polizia-baseetan, gainerako polizia-kidegoak jakinaren gainean egon zitezen, egileak Euskal Autonomia Erkidegotik atera zirela frogatuta baitzegoen.

Ostiral goizaldean, Calafelleko (Tarragona) Udaltzaingoak gizon bat identifikatu zuen herri horretan, eta bilaketa- eta atxiloketa-seinalea ikusi zutenez, atxilotu egin zuten. Jarraian, bi susmagarriek Irundik ihes egin ondoren Esquadra Mossoak haien bizilekura sartu ziren eta bertan atxilotu zuten bigarren inplikatua.

IKGLZko agenteak Tarragonara joan ziren Kataluniako poliziarekin batera egindako diligentziekin jarraitzeko. Atxilotuei ikertutako gertakariekin lotutako ebidentziak atzeman zizkieten, besteak beste, bi egileek biktimaren etxebizitzatik ustez lapurtu zituzten bitxi batzuk.

Bi atxilotuak, 31 eta 36 urtekoak, gaur, igandea, eraman dituzte Irungo epaitegira