"ETAri aurre egin zioten ertzainen kemena eta konpromisoa" laudatu ditu lehendakariak

Urtero bezala, aurten ere ekitaldia egin dute Arkautin polizia-lanagatik zorionak emateko eta kondekorazioak banatzeko nahiz zerbitzuan hildako agenteak (azkena, Cristina Martinez Landa, 2024ko abuztuaren 13an hil zen, Gasteizen) eta ETAk hil zituen 15 agenteak omentzeko eta gogoratzeko. 

Bertan izan da Imanol Pradales, aurrenekoz lehendakari gisa, eta bere hitzartzean "ETAren krudelkeriari aurre egin zioten ertzain guztien adorea eta konpromisoa" goraipatu ditu. Azpimarratu duenez, "urte gehiegitan, ertzaina izatea ez zen erraza gure gizartean, ertzain izatea erabakitzen zutenek uko egiten zioten bizimodu normalizatu eta duin bati, herrian lasai ibiltzeari". Horren hitzetan, "pertsona ororen altxorrik preziatuenari uko egiten zioten: askatasunari".

Halaber, Pradalesek eskerrak eman dizkie beren jardunarekin bizitzak salbatu dituzten udaltzain, ertzain zein gizarte zibileko kideei, zerbitzu bokazioa muturreraino eramateagatik. "Babesten dituzuen pertsonen osotasuna eta bizitza zuenaren gainetik jarri duzue. Jaso ezazue nire aitortza eta esker ona, euskal herritarren segurtasuna eta lasaitasuna bermatzeko erakutsitako eredugarritasunagatik", gaineratu du.

Bingen Zupiria Segurtasuneko sailburua eta Maria Jesus San Jose Justizia eta Giza Eskubideetako sailburua ere izan dira bertan.

Josu Bujanda Ertzaintzako buruak, bere aldetik, hildako ertzainen oroimena bizirik mantentzeko eta ertzain-etxeetan haiei buruz hitz egiteko deia egin du, agente berri bat iristen denean "gertatu zena ezagutu dezan eta berriro gerta ez dadin".

Ekitaldia Arkautiko Polizia eta Larrialdietako Euskal Akademian egin dute, eta zerbitzuan hildako agente guztiak oroituz hasi da. Horien omenez, bi txapel gorri jarri dituzte oroigarri gisa jarritako monolitoaren aurrean.

Dominak eta zorionak

Ekitaldian, bereizgarri berdea duen polizia-merezimenduaren domina bat eman da. Bereizgarri hori egitate garrantzitsuak edo ezohiko polizia-jarduerak burutzen direnean ematen da, baldin eta beren izaeragatik, hain meritu handikoak izanda, goi mailako aitorpena merezi badute.

Gainera, Ertzaintzak bereizgarri zuridun 10 domina eman ditu. Bereizgarri hori ematen da zailtasun edo garrantzi handiko zerbitzuetan agenteek izandako parte-hartze arrakastatsuagatik eta horietan dohain profesional edo zibiko apartak erakusteagatik.

Gaurko ekitaldian, bereizgarri urdineko 5 domina ere banatu dituzte. Domina horiek ematen zaizkie beste polizia-kidego batzuetako kideei, larrialdietako eta babes zibileko zerbitzu publikoetako kideei, segurtasun pribatuko kideei eta segurtasun publikoaren defentsan garrantzi handiko ekintzak egiten dituztenei, bai eta Ertzaintzaren mesederako eta ospea hobetzeko harekin funtsezko lankidetzan aritu direnei ere.

Azkenik, 2024an zerbitzuan merezimendu bereziko egintzak egin zituzten eta zoriondu dituzten ertzainen izen-abizenak irakurri dituzte jendaurrean. Guztira 30 ertzain zoriondu dituzte gaur, polizia-lan aipagarria egin dutelako.