Behin egoerak hobera eginda, garbiketa lanei ekin diete inguru kaltetuenetan

Azken orduetako euri-jasen ondorioz, ibaiek gainezka egin dute zenbait tokitan. Bizkaia ipar-mendebaldean eta Gipuzkoa hego-mendebaldean erruz bota du euria 06:00ak arte, prezipitazioengatik ezarritako abisu horia indarrean egon den ordura arte. Hortik aurrera, hobera egin du, baina orain garbiketa lanak datoz.

Eguneko lehen orduak gorabeheratsuak izan dira han-hemen: errepideak itxita, ur-putzuak, luiziak eta bidean harrapatuta geratu diren ibilgailuak (anbulantzia bat tartean). Mungialdean izan dira ondorio latzenak.

Butroe ibaiak gainez egin du bertan, eta uholdeak sortu dira Mungian, Gatikan eta Maruri-Jataben.

Ekaitzaren ostean, barealdia iritsi da, baina orain garbiketa lanak datoz. Suhilzaileak, adibidez, etenik gabe ari dira lanean, ura garaje eta etxabeetatik atera nahian.

Trafikoaren egoera

Errepideetan ere traketsa izan da goiza. Ur-putzuek batetik eta luiziek bestetik, zirkulazioa zaildu dute. 15:40rako konpondu dira gorabehera gehienak, BI-3144 errepidean salbu; izan ere, Gatikan itxita dago Mungia eta Igartua lotzen dituen errepidea.

Ibaien egoera

Ibaiak gainezka egin du Butroeren arroko zenbait puntutan. Maila laranjara iritsi da gaur goizaldean Mungian, eta, ondorioz, Lauaxeta zubia itxi dute, badaezpada. Suhiltzaileek eta Udaltzaingoak esku hartu behar izan dute Butroeko arroaren inguruko errepide eta lurpeko aparkalekuetan Derion, Bakion eta Mungian.

Euri gehien Bizkaian zegoen iragarrita, 24 orduan metro koadroko 60 litroraino egitea aurreikusi baitu Euskalmetek. Txarrena 06:00ak arte espero zen, eta abisu horia zegoen ezarrita; hortik aurrera, baina, egoerak hobera egin du.

Mungiako Udalak, hala ere, Butroe ibaiaren arroan ez aparkatzeko eta ez ibiltzeko gomendioa egin du, eta Legarda ikastetxeko jolastokia herritarren eskura jarri du autoak uzteko.

Getxon, Gobela ibaiak gainezka egin du, eta horrek gorabeherak eragin ditu Larrañazubin, Faduran eta Salsidun. Getxoko Udaltzaingoak esan du ez dela kalte pertsonalik izan, baina agintarien jarraibideak bete eta kontu handiz ibiltzeko eskatu dute.

164 gorabehera

Bilboko itsasadarrean ere, Zangroiz Sondikako auzoa maila laranjara iritsi da 06:36an mareak goia jo duenean.

Euskalmetek emandako datuen arabera, metro koadroko 41 litro pilatu dira Mungian sei orduan, 36 Urdulizen eta 16 Aretxabaletan.

SOS Deiak-112 zerbitzuak euriteekin lotutako 164 gorabeheraren berri eman du, gehienak Bizkaian, baina egoera eta ibaien emaria normaltzen hasi dela jakinarazi du.