Mugikortasun iraunkorrari eta elikagaien industriari lotutako LHko bi titulu berri onartu ditu Eusko Jaurlaritzak

Eusko Jaurlaritzaren Kontseiluak Lanbide Heziketako bi titulu berriren curriculumak ezartzen dituzten dekretuak onartu ditu asteazken honetan egin duen bileran: bata mugikortasun jasangarri eta seguruari lotua eta bestea elikagaien industriari.

Hezkuntza sailburuak, Begoña Pedrosak, dekretu hauek aurkeztu ditu Kontseiluan, "produkzio-sarearen beharrekin eta egungo gizarte-erronkekin bat datorren LH bultzatzeko, prestakuntza-eskaintza zabalduz eta ikasleen enplegagarritasun-aukerak hobetuz".

Mugikortasun iraunkorrari buruzko prestakuntza

Alde batetik, Mugikortasun Seguru eta Iraunkorrerako Prestakuntzako goi-mailako teknikariaren heziketa-zikloaren curriculuma onartu da, 2.182 orduko goi-mailako titulazioa (120 ECTS kreditu).

Ziklo honen helburua da bide-hezkuntzaren, mugikortasunaren segurtasunaren eta garraioaren iraunkortasunaren arloko prestakuntza-ekintzak diseinatu, eman eta ebaluatzeko gai diren profesionalak prestatzea, bide-segurtasunaren, garraiobide desberdinen erabileran bizikidetzaren eta ingurumen-iraunkortasunaren balioetan hezteko. Lanbide-profilak honako eginkizun hauek hartzen ditu bere baitan: gidarien prestakuntza, bide-hezkuntzako programak garatzea, mugikortasun-planak egiten parte hartzea edo erakunde publiko eta pribatuei mugikortasun seguru eta iraunkorraren arloan aholkularitza ematea. 

Lan-aukerei dagokionean, nabarmentzekoak dira bide-prestakuntzako irakaskuntza, autoeskolen zuzendaritza, bide-sentsibilizazioko eta -berreziketako ikastaroak ematea edo administrazioetako eta erakundeetako hezkuntza-programetan eta mugikortasun-planetan parte hartzea.

Olioei eta ardoei buruzko prestakuntza

Onartutako bigarren dekretuak Oliba-olioetako eta ardoetako teknikariaren heziketa-zikloaren curriculuma ezartzen du. Erdi-mailako titulazioa izango da, 2.182 ordukoa.

Heziketa-ziklo honek ikasleak prestatzen ditu oliba-olioak, ardoak eta beste edari batzuk elaboratzeko, eraldatzeko, ontziratzeko, etiketatzeko, enbalatzeko, sustatzeko eta merkaturatzeko jarduerak garatzeko, produktuaren kalitatea eta elikagaien segurtasunari eta ingurumen-babesari buruzko araudia betetzen dela bermatuz. Lanbide-profilak honako hauekin lotutako gaitasunak biltzen ditu: erauzketa- eta hartzidura-prozesuen kontrola, produktuen egokitzapena, kalitate-kontrola, instalazioen kudeaketa eta merkaturatzea, trazabilitatea, landutako produktuen osasungarritasuna eta ekoizpenaren iraunkortasuna.

Tituludunek almazaretan, upeltegietan eta elikagaien sektoreko enpresetan egin ahal izango dute lan, bai enpresa txikietan, bai handietan, produkzioan, kalitate-kontrolean edo merkaturatzean funtzio teknikoak betez.

Eusko Jaurlaritzaren arabera, bi zikloek gero eta eskari handiagoa duten eremuei erantzuten diete, eta ikasleak eraldatzen ari den lan-merkatu baterako prestatzen laguntzen dute, prestakuntza praktikoa, eguneratua eta enplegura bideratua eskainiz.