ANk Marokoko goi-kargudunak auzipetu ditu Saharako genozidioagatik

Pablo Ruz Auzitegi Nazionaleko epaileak Marokoko hamaika goi-kargudun, militar eta polizia auzipetu ditu genozidioa leporatuta, 1975 eta 1992 artean egindako erasoengatik, tartean torturak, hilketak eta desagerpenak.

Erabaki hori hartzeko, epailea 19 biktima zuzenen lekukotzan oinarritzen da, salatutako delituen “egiazkotasuna berresten” dutelako, eta kasu askotan “garai hartako agiriak edo argazkiak” daudelako.

Ruzek azpimarratu du “ezinbestekoa” izan zela “2013ko otsailean Amgalan (Sahara Mendebaldean) 8 hilotz zituen hobi komuna aurkitu izana, DNA frogekin eta soinean zeramatzaten agiriekin identifikatu” ahal izan dituztelako, eta ondorioz, hilketa horien lekukoei deklarazioa hartu ahal izan dietelako.

Abba Ali Said Dafena da lekukotzetako bat. Said Daf haur bat zen 1976ko otsailaren 12an eta 13an Samrako kanpamenduaren kontrako sarraskia, manta baten azpitik, ikusi zuenean.

Egun hartan ikusi zuen nola soldadu marokoarrek bi gizonezko hil zituzten kanpalekuan eta gero lurperatzen zituzten. “Gero, oinak eta eskuak agerian utzi zituzten, animaliek jateko”, lekuko horren arabera. Gainera, gorpuzkinak aurkitu zituzten 2013an aurkitutako hobi komunean.

Beste kasu bat Um Dreiga kanpalekuaren kontrako erasoa da. Marokoko hegazkin militarrek napalma eta fosforo zuria jaurti zuten eta 39 pertsona hil eta 75 larri zauritu zituzten.

Era berean, El Aaiungo kuartel bateko torturen eta desagerpenen lekukotzak ere agertzen dira autoan.

Auzipetuak

Auzipetuak hauek dira: Driss Sbai Agadirreko Errege Jendarmeriako koronel nagusia, Brahim Ben Sami Polizia Judizialaren zuzendari nagusiaren kontu-hartzailea, Hariz El Arbi komisarioa; Lamarti koronela; Abdelhafid Ben Hachem Saharako Lurralde Administrazioko gobernadore ohia; Abdelhak Lemdaour koronel ohia; Said Oussaou eta Hassan Uychen Smarako erreguxiatu kanpalekuko gobernadore ohiak; Muley Ahmed Albourkadi, Bel Laarabi eta Abdelghani Loudghiri.

Zazpirentzat (Ben Hachem, Abdelhak Lemdaour, Driss Sbai, Said Ouassou, Hassan Uychen, Brahim Bensami eta Hariz El Arbi) bilatzeko, atxilotzeko eta preso sartzeko eskaria egin du epaileak.