Ia 900 pertsona hil dira Haitin, Matthew urakanaren ondorioz

Matthew urakanaren ondorioz hildakoen kopuruak gora egin du Haitin, eta herrialde horretako babes zibilak ostiral honetan baieztatu duenez, gutxienez 900 pertsona hil dira azken orduotan, Reuters agentziak jakinarazi duenez.

Une hauetan, Haitiko larrialdi zerbitzuak lanean dabiltza kalte handiak sortu diren lekuetara iristeko. Izan ere, urakanak gogor astindu zuen herrialdea asteartean, eta kalte material ugari eragin ditu herrialdean. Egoera horren aurrean, igande honetarako, urriak 9, aurreikusita zeuden hauteskunde orokorrak atzeratu behar izan dituzte.

Matthew urakanaren eraginez tokirik kaltetuena Dame Marie izan da, eta bertan zauritu diren ehunka pertsona Haitiko hiriburura eraman dituzte (Port-au-Prince).

Momentuz, Haitiko larrialdi zerbitzuek ez dute zehaztu urakanak zenbateko kalteak utzi dituen herrialdean, baina azken orduetan gertatu den bezala, datozen orduotan ere hildakoen kopuruak gora egin dezakeela uste dute bertako agintariek. Izan ere, kaltetutako toki askotan komunikazioa moztu da, eta larrialdi zerbitzuak zailtasun ugari ditu leku horietara iristeko.

Hildako gehienak Haitiko hegoaldean izan dira: Les Cayes, Dame Marie eta Jeremie hirietan.

"Kalteak oso handiak dira", adierazi du Jocelerme Privert Haitiko presidenteak. Era berean, nazioarteko beste herrialde askok laguntza eskaini dietela esan du Privertek. Ildo horretatik, etorkizunean egiten dituzten eraikuntzak sendoagoak izan beharko direla azaldu du Haitiko presidenteak, mota horretako hondamendi naturalei aurre egin ahal izateko.

Bestalde, Haitiko Gobernuak baieztatu du kalte handienak herrialdearen hegoaldean izan direla, eta laguntza eskatu die Gobernuz Kanpoko Erakundeei (GKE) eta nazioarteari.

2010ean, Haitin izandako lurrikararen ondorioz 300.000 pertsona hil eta milaka lagun zauritu ziren. Gainera, milioi eta erdi pertsona inguruk astindu horren ondorioak pairatu zituzten urte hartan.

13 hildako koleragatik

Gutxienez 13 pertsona hil dira Haitin kolerak jota, eta dozenaka gaixorik daude herrialdearen hego-ekialdean urakana igaro ostean, agintariek jakitera eman dutenez.

Obamak larrialdi egoera ezarri du Floridan

Ostegun honetan, urriak 7, Barack Obama AEBetako presidenteak larrialdi egoera ezarri zuen Floridan. Horri esker, Matthew urakanak kalteak eragin dituen tokietan batera arituko dira AEBko Segurtasun Saila eta Larrialdien Kudeaketarako Agentzia Federala (FEMA).

Matthew urakana Hego Carolinara iritsi da

Matthew urakana McClellanville hiritik oso hurbil ibili da larunbat goizean, Hego Carolinako kostaldean, hain zuzen. Uholde esanguratsuak eragin ditu barrualdean, AEBko Urakanen Zentro Nazionalak baieztatu duenez.