Etorkizun politikoa erabakitzear, Argentinako presidentzialen aurreko primarioetan

Hauteskunde primarioak egiteko ireki dituzte Argentinako hauteslekuak. Presidentetzarako hauteskundeetan parte hartuko duten hautagaitzak eta hautagaiak erabakitzen ari dira argentinarrak. Lehen itzulia urriaren 27an egingo dute.

Igande honetako primarioetan bi ideia ekonomiko daude aurrez aurre: lau urte gehiago presidentea izan nahi duen Mauricio Macrik (Elkarrekin Aldaketaren Alde) defendatzen duen austeritatea, eta Alberto Fernandez (Guztion Frontea) peronistak babesten duen interbentzionismo ekonomikoa, urriko hauteskundeetan presidenteorde izateko hautagaia izango den Cristina Fernandez de Kirschner presidente ohiarekin batera.

Peronistak daude aurretik inkestetan, baina aldea estuegia da emaitza aurreratzeko.

Azken asteetako adierazle ekonomiko positiboak alde izatea espero du Macrik, eta iaz Nazioarteko Diru Funtsarekin negoziatu zuen ia 57.000 milioi euroko erreskatearen ostean galdutako konfiantza berreskuratzea.

Fernandezek, bestalde, soldaten igoera orokorra eta jubilatuentzat medikamentuak doakoak izatea agindu du, eta inflazioa eta langabezia handitu izana aurpegiratu dio Macriri.

Hauteskunde primarioek merkatuetan izan dezaketen eraginean dituzte guztiek begiak jarrita. Fernandezek alde handiarekin irabazten badu, merkatuek behera egitea aurreikusten da, eta horrek Macriren gainbehera ekarriko luke urrian.

Fernandez de Kirschner ez da hedabideetan gehiegi agertu, baina agertu denean eragin izugarria izan du, analisten arabera. Azken asteetan hautesle peronista guztiak batzea lortu omen du, baita ezkertiarrak ere.

Beste hautagaiak

Inkestetan hirugarren tokian daude Roberto Lavagna eta Juan Manuel Urtubey (Adostasun Federala 2030). Zeregin garrantzitsua izan lezakete presidentetzarako hauteskundeetan, nahikoa babes lortzen badute primarioetan.

Ezkerreko Fronteak, Nicolas del Cañorekin eta Jose Luis Espert ekonomistarekin, presidentetzarako hauteskundeetan egoteko behar dituzten botoen % 1,5 lortzea aurreikusten da.

Aurreko batzuetan bezala, primarioekin batera senatariak aukeratuko dituzte zortzi probintziatan (Chaco, Entre Rios, Neuquen, Rio Negro, Salta, Santiago del Estero, Tierra del Fuego eta Buenos Airesko hiria) eta diputatu nazionalak herrialde osoan, Parlamenturen erdia berritzeko. Buenos Aires hirian, Buenos Aires probintzian eta Catamarcan ere primarioak egingo dituzte karguak hautatzeko, eta Santa Cruzen gobernadorea hautatuko dute.