Zertan ahaleginduko da Boris Johnson?

Jeremy Corbyn buruzagi laborista, ez da erori Boris Johnson lehen ministroak ezarritako tranpan. Corbynek hilabeteak daramatza hauteskundeak aurreratzea eskatzen eta Johnsonek atzo hauteskunde horiek  urriaren 15erako deitzea proposatu zion. 

Baina hauteskundeak egun horretarako deituta, ezinezkoa izango zen brexit basatia ekiditea, akordiorik gabe  urriaren 31ean  Europako Batasunetik irtetea alegia. Horregatik Corbynek erabaki du  lehenik eta  behin atzo Parlamentuak  onartutako legea martxan jarri behar dela, akordiorik gabeko brexita galarazten duena, eta ondoren egingo direla hauteskundeak.

Hauteskundeak, beraz, berandu baino lehen egingo dira, Johnsonen jarrera jada  eutsiezina bait da. 3 bozketa segidan galdu ditu,  bere alderdiko 21  diputatu kontserbadorek bere kontra bozkatu dutelako. Johnsonek guztiak kanporatu ditu, beraz une honetan talde parlamentario kontserbadorea argi eta garbi gutxiengoan dago.

Johnsonek ahalegin guztiak egingo ditu urriaren 31era iristeko; ezin da erabat baztertu Parlamentuak onartu berri duen legea ez betetzen saiatzea ere. Baino beste  trikimailuren bat ba ote du gordeta? Horren berri eman ote zion Biarritzen Donald Trumpi? Kezkagarria da  Trumpek atzo jarri zuen txio hori: “Nere laguna da eta  ez dago zalantzarik lortuko duela. Borisek badaki nola irabazi, ez berarengatik  kezkatu”.