Mariupoletik zibilak ebakuatzeko saiakerak jarraitzen du

Ukrainako Gobernuak Mariupoletik atera nahi duten pertsonak jasotzeko lau gune ezarri ditu asteazken honetarako, Azov itsasoaren ertzeko hiri horretan geratzen diren ehunka pertsonak ebakuatzen saiatzeko.

Iryna Vereshchuk Ukrainako lehen ministrordeak Telegram sarean iragarri du zibilak jasotzeko gune horiek ezarriko dituztela, eta ohartarazi du ebakuazioak egingo direla "egoerak ahalbidetzen badu".

Ministroak "Mariupoleko operazio humanitario" deitu duen operazio honen helburua da zibilak Mariupoletik ukrainarren kontrolpean dagoen Zaporiyia ingurura eramatea, Mariupoletik iparraldera.

Ukrainako agintariek diotenez, 10.000 biztanle baino gehiago daude oraindik hiriko hondakinen artean, urik, elektrizitaterik eta oinarrizko produkturik gabe, eta Moskuk zonalde horretara laguntza humanitarioa eraman nahi duten taldeei bidea oztopatzen diela salatu dute.

Operazio humanitarioak Azovstaleko altzairutegiko zibilak ebakuatzen jarri zituen indarrak asteartean, duela aste batzuk Errusiako soldaduek setiatu ostean harrapatuta zeuden zibilak, hain zuzen; 101 pertsona atera ahal izan zituzten lantegitik. 

Hori izan zen Ukraina eta Errusiako gobernuen akordioarekin, NBEren laguntzarekin eta Gurutze Gorriaren laguntzarekin abian jarritako garrantzi handiko lehen erreskate-operazioa. Guztira 137 pertsona atera ziren Mariupol ingurutik, eta suntsipenaren kontakizun beldurgarriak iritsi ziren bertatik.

Erasoa hasi aurretik ia milioi erdi biztanle zituen hiria, ia guztiz suntsitu dute errusiarren erasoek. Mariupolen erabateko kontrola dutela dio Errusiak, Azovstal lantegi siderurgikoa izan ezik. 

Han setioari eusten dio Errusiak eta azken orduetan jakitera eman duenez, altzairutegiaren eremuan dauden Ukrainako indarrak "modu seguruan blokeatu" dituztela ziurtatu du, eremutik alde egin ez dezaten.

Sergei Shoigu Errusiako Defentsa ministroak azaldu duenez, "zibilak askatzeko eta armak uzteko" proposamenak egin dizkiete militar ukrainarrei "zibilen bizitzak salbatu eta haiei tratu duina ematearen truke" baina haiek "entzungor" egin dietela salatu dute, Errusiako komunikabideek jakinarazi dutenez. NATOko, Europar Batasuneko eta Ameriketako Estatu Batuetako aliatuei "Ukrainara armak bidaltzen jarraitzea" leporatu die, gainera, Vladimir Putin Errusiako presidenteak asteazkenean egin zuen bezala.

Ukrainako erasoa Donetsken

Donetskeko Herri Errepublikako agintariek asteazken honetan salatu dutenez, Ukrainako Armadak Makeyevkako (ekialdea) erregai-biltegi baten aurka egindako erasoan pertsona bat hil da.

TASS albiste-agentzia errusiarrak jasotako informazioaren arabera, artilleriarekin egindako erasoan bi lagun zauritu dira, eta zonaldean lau erregai-tanke erre dira, Kievek ez du, ordea, horri buruzko adierazpenik egin.