Fukushimako ura, Japonia osoari eragiten dion konpondu gabeko arazoa, krisi nuklearretik 12 urtera

Japoniako ipar-mendebaldea birrindu zuten lurrikara eta ondorengo tsunamia izan zirenetik 12 urte betetzen diren honetan, Fukushima zentral nuklearretik datozen ur-isuriaren arazoa konpondu gabe dagoela eta Japonia osoari eragiten diola ohartarazi dute ahots askok.

"Kezka dago, ez bakarrik Japonian edo Fukushiman, mundu osoan baizik. Gobernu zentralari esan diogu ez dela bakarrik Fukushimari eragiten dion arazo bat, Japonia osoari baizik", azaldu du Masao Uchibori prefekturako gobernadoreak.

Hamabi urte igaro dira 15.900 hildako eta 2.523 desagertu eragin zituen hondamendi naturala jazo zela, eta Fukushimak oraindik "erronka garrantzitsuak" ditu, horien artean, Fukushimako zentral nuklearretik ur kutsatua Ozeano Barera isurtzea. Horrek ika-mika piztu du tokiko biztanleriaren eta ondoko herrialdeen artean.

"Istripu nuklear bati zelan aurre egin ez genekien, ez geneukalako aurrekaririk. Gobernuari eskatzen diogu erantzukizunez aritzeko eta oinarri zientifikoa duen informazioa partekatzeko", gaineratu du Uchibori.

Izan ere, Fukushimako zentralean pilatutako ur kutsatua datozen hilabeteetan itsasora botatzeko plana onartu du Japoniako Gobernuak urte hasieran. Tritio salbu, 62 materia erradioaktibo mota erretiratzeko tratamendua ematen ari diote urari.

Zonaldeko bizilagunek eta Pazifikoko hainbat herrialdek erabaki horren kontra protesta egin dute, argudiatuz gizakien osasunarengan eta itsas ingurugiroarengan izan ditzaketen ondorioak ebaluatu ahal izateko Japoniak eskainitako datuak "eskasak" direla.

Lainotuz doan oroitzapena

Hondamendi naturalaren oroitzapena galtzearen inguruan kezka zabaldu da eskualdean, zentral nuklearrak berriro irekitzeko eta erreaktoreen bizitza 60 urte baino gehiago luzatzeko Japoniako Gobernuak erakutsitako asmoagatik bereziki.

"Azken 12 urteetan hondamendi sortaren aurka borrokatzen ibili gara, baina gertatutakoaren gogorapena lainotzen ari dela sentitzen dugu", adierazi du Uchiborik, lurrikara, tsunamia, hondamendi nuklearra eta eskualdeak duen ospe txarrari buruz.

Azken urteetan, AEB edo Erresuma Batuko bezalako herrialdeek bertan behera utzi dituzte Fukushimako produktuen inportazioaren gaineko betoak, eta nekazaritza eta abeltzaintza garatzeko ahaleginak egiten ari da eskualdea.

Dena dela, prefektura horretako sei udalerrietako 300 kilometro karratutan (Katsurao, Okuma eta Futaba barne) "itzulera zaileko zonaldea" sailkapena dute, eta horien birgaikuntza airean dago oraindik ere.