NBEko Segurtasun Kontseiluak ez du agiri bateraturik adostu Israelen eta Hamasen arteko gerrari buruz

Israelen eta Palestinako lurraldeen arteko gatazka aztergai, urgentziazko bilera egin du bart NBEko Segurtasun Kontseiluak. Ateak itxita egin duten bileran ez dute, ordea, agiri bateraturik adostu, eta ez dute Hamasen ezusteko erasoaldia gaitzetsi (Israelek hala nahi bazuen ere). Hala, Israelgo zein Palestinako zibilak babestea eta gatazka ez areagotzea ezarri dituzte helburutzat. 

Batzarra amaituta enbaxadore batzuek kazetariei esan dietenez, Tor Wennesland NBEk Ekialde Hurbilerako duen koordinatzaile bereziak egindako laburpena entzun dute kontseiluko 15 kideek, eta diplomazia bideak lehenestearen garrantzia nabarmendu dute denek. 

Lana Nusseibeh Arabiar Emirerri Batuen enbaxadorearen esanetan, "bilera asko" dituzte egiteko egoera "gordina eta aldakorra" delako. Azpimarratu duenez, kontseiluko kideek badakite "nazioarteko eta alde biko bideak jarraitu behar dituztela gatazka arintzeko, bi aldeetako zibilak babesteko helburua lehentasun jota". 

Palestinak eta Israelek jarrerak zehaztu dituzte bilera baino lehen

Bilera hasi aurretik egindako adierazpenetan, Riad Mansur Palestinak NBEn duen enbaxadoreak Gazako indarkeria gelditzeko eta gerra berri bat eragin duen gatazkaren "erroei" heltzeko eskatu dio Israeli.

Mansurrek nazioarteari aurpegiratu dio "israeldarrak hiltzean" soilik jartzen duela arreta, eta ez dituela aintzat hartzen Israelek Gazan egindako blokeoaren eta erasoen inguruan Palestinak jarritako salaketak.

Segurtasun Kontseiluaren bilerari begira, nazioarteko komunitateak Israeli eta bere autodefentsari ematen dien babes handia aitortu du, baina, aldi berean, palestinarren aurkako "agenda kolonialista eta arrazistari" ezikusi egiten zaiola salatu du, eta, beraz, gatazkaren "panorama globala aintzat hartzeko" eskatu du.

"Bide baketsua aukeratu genuen gure eskubideak lortzeko, baina Israelek indar gordina erabiltzen jarraitu zuen palestinarren bizitzen eta eskubideen aurka. Israelek ezin du nazio batean, bere herrian, lurraldean eta tenpluetan gerra osoa egin eta gero bakea espero: gatazkaren erroari heldu behar dio", esan du.

"Nire atzeko aretoan dauden guztiak (...) ados daude jokoa amaitzearekin. Israelek babes politikoa eta militarra espero eta eskatzen du, nazioarteko legitimitate eta adostasun funtsezkoenen aurka dauden helburuak sustatzen dituen bitartean", gaineratu du.

"Ezin da esan: 'Ezerk ez du justifikatzen israeldarrak hiltzea' eta gero palestinarren hilketak justifikatu. Ez gara infrahumanoak, berriz diot, ez gara infrahumanoak", gaineratu du Mansurrek.

Era berean, Israelek NBEn duen enbaxadore Gilad Erdanek nazioarteko batasuna eskatu du Segurtasun Kontseiluaren aldetik.

"Gerra-krimen gordin eta barbaroak ikusten ari gara: zibilak erailtzen ari dira, bahituez abusatzen, amei umetxoak kentzen", adierazi du diplomazialariak hedabideei egindako adierazpenetan, eta gerra berri bat eragin duten erasoak "gure Irailaren 11" gisa deskribatu ditu.

Ziurtatu duenez, gaur nazioarteko komunitateko "kide askok" babesa adierazten diote Israeli, baina "baliteke bihar hala ez izatea", eta NBEri eta "bereziki" Segurtasun Kontseiluari leporatu dio bere herrialdeari buruzko "memoria oso laburra" izatea, nahiz eta ez duen inor seinalatu nahi izan.

Hamas boterera iritsi zenetik, "mundua talde islamistarekin hitz egiten saiatu da", esan du, eta "nazioarteak milaka milioi bidali ditu Gaza birgaitzeko funtsetan", baina, salatu duenez, "diru hori lurraldean azpiegitura terroristak garatzeko erabili dute".