Tentsioa Venezuelan, Madurok kargua hartu baino ordu gutxi lehenago

Venezuela mundu mailako arretaren epizentroan dago, Nicolas Maduro presidentetzarako aldi berri bat hartzeko prestatzen ari da eta. Ekitaldia bihar izango da, eta herrialde barruko eta kanpoko eztabaidei aurre egin beharko die. Oposizioak eta nazioarteko hainbat erakundek adierazi dute hauteskunde prozesuan irregulartasunak izan zirela. Bitartean, Maduroren administrazioak segurtasun neurriak areagotu ditu, eta kritiko eta disidenteak jazartzen jarraitzen du.

Edmundo Gonzalezek, oposizioaren giltzarri eta bere burua presidente legitimo izendatu duenak, herrialdera itzultzeko asmoa duela berretsi du, estatuburu gisa zin egiteko. Gonzalezek hainbat eskualdetako liderren babesa duela ziurtatu du, eta "demokrazia berrezartzeko" saiakera dela uste dutela adierazi. Hala ere, Maduroren gobernuak emandako atxilotze agindu bati aurre egin behar dio, eta horrek tentsioa biziagotzen du.

Aldi berean, azken orduetan atxiloketa-oldea izan da, oposizioko pertsonak eta giza eskubideen aldeko ekintzaileak jomugan. Atxilotuen artean, Enrique Marquez —presidentegai ohia— eta Carlos Correa —adierazpen askatasunaren defendatzailea— daude. Oposizioak salatu egin ditu ekintza horiek, jazarpen- eta beldurtze-kanpainaren parte direlakoan.

Gobernuak, bestalde, segurtasun operazio zabala egin du herrialdeko hiri nagusietan, Caracaseko gune estrategikoetan indar militarrak indartzea barne. Agintariek ohartarazi dute herrialdea ezegonkortzeko edozein saiakerari irmo erantzungo zaiola. Mehatxuak mehatxu, oposizioko liderrek kalera ateratzeko deia egin diete venezuelarrei.

Nazioartean, krisiak komunitate globala polarizatu du. Errusia, Txina eta Iranek Maduroren alde egiten dute, Estatu Batuek, Argentinak eta Uruguaik, ordea, Gonzalez presidente legitimotzat hartzen dute. Europar Batasuna Maduroren gobernuaren aurka agertu da, baina ez du Gonzalez babestu.

Ordurik ordu, Venezuelako egoera geroz eta ziurgabeagoa da. Biharko aurreikusitako mobilizazioek eta Maduroren presidente karguaren zina egiteko zeremoniak inflexio puntua ekar lezakete herrialdeko egoera politiko eta sozial nahasian.