Hamasek ohartarazi du larunbatean ez dela preso-trukerik izango Israelek "eginbeharrak betetzen ez baditu"

Hamasen beso armatuak, Al-Qassam Brigadek, iragarri dutenez, ez dute larunbat honetan, otsailak 15, bahitu israeldarren eta preso palestinarren trukerik egingo, "Israel etsaia su-eten akordioaren baldintzak urratzen ari delako". "Ondorioz, eperik gabe atzeratzen dugu 2025eko otsailaren 15ean askatzea aurreikusita zegoen preso sionistak entregatzea", iragarri du Abu Obeida bozeramaileak eta hala berretsi dute geroago, zabaldutako ohar batean.

Gazako Zerrendaren iparraldera bidean diren desplazatuen itzulera moteltzea leporatzen die Hamasek Israelgo agintariei, baita biztanleria zibilari eraso egiten jarraitzea eta laguntza humanitarioa sartzea oztopatzea ere bai.

Hamasek indarrean dagoen akordioarekiko duen "konpromisoa" azpimarratu du, baina etorkizunean zer gertatuko den Israelek hartuko duen jarrerari lotuta egongo dela zehaztu du, eta, beraz, printzipioz ez du aurreikusten bahitu gehigo entregatzea epe motzean —joan den larunbatean hiru gizonezko askatu zituzten—.

"Gatibuak entregatu baino bost egun lehenago nahita egin dugu ohartarazpena, bitartekariei okupazioari (Israeli) presioa egiteko nahikoa tarte emateko, adostutakoa bete dezaten", zehaztu du geroxeago Hamasek SANAD Palestinako albiste-agentziak jasotako ohar batean.

"Atea irekita mantentzen dugu trukea garaiz egiteko, okupazioak eginbeharrak betetzen baditu", gaineratu du. "Akordioaren baldintzekin dugun konpromisoa berresten dugu, betiere okupazio sionistak horrekin bat egiten badu", azpimarratu du.

Manifestariek Israelgo Gobernuari su-eten akordioa betetzeko eskatu diote

Manifestariek Ayalon autobidea hartu dute astelehen honetan, Tel Aviveko erdigunean, Israelgo Gobernuari su-eten akordioa aplikatzea eskatzeko.

Manifestariek akordioaren epeak murriztea eskatu dute gatibu israeldar guztiak azkarrago askatzeko, eta eskaera horrek indarra hartu du azken hiru askatuen itxura eta osasun egoera eskasa agerian geratu ostean.

Orain arte bost truke egin dira. Lehenengoa urtarrilaren 19an gertatu zen, eta, ondoren, larunbatero Hamasen esku zeuden 3-4 gatibu eta Israelgo kartzeletan zeuden preso palestinarrak askatzen joan dira.