Hamasek sei israeldar askatu ditu larunbat honetan, Gazako su etenaren baitan egindako zazpigarren trukean

Hamas talde islamista palestinarrak sei bahitu israeldar askatu ditu larunbat honetan, bi zeremonia publikotan eta izaera pribatuko hirugarren batean, Gazako Zerrendaren erdialdean eta hegoaldean. Bahituen eta presoen arteko zazpigarren trukea da gaurkoa, urtarrilaren 19an Hamasen eta Israelen arteko su-etenaren lehenengo fasea indarrean sartu zenetik.

Sei bahituetatik bost Gurutze Gorriaren esku utzi dituzte, bi ordu eta erdiko aldearekin Rafahn (Zerrendaren hegoaldean) eta Nuseirateko errefuxiatu-eremuan egindako bi zeremoniatan.

Omer Shem Tov (22 urtekoa), Omer Wenkert (23 urtekoa) eta Eliya Cohen (27 urtekoa) gazteak utzi dituzte libre Nuseiraten, osasun egoera onean, itxuraz. Nova musika jaialdian bahitu zituzten hirurak 2023ko urriaren 7an. Berdez jantzita eta publikoa agurtzen zutela agertu dira hirurak eskenatokian, dozenaka milizianoz inguratuta.

Hiru horiek askatu aurretik, Hamasek beste bi bahitu utzi ditu Gurutze Gorriaren esku Rafahn, Gaza hegoaldean: Avera Mengistu eta Tal Shoham. Mengistu (37 urte) etiopiar-israeldarra da, eta 2014an bahitu zuen Hamasek, Gazako Zerrendan bere kasa sartu ostean. Tal Shohamek (39 urte) Austriako eta Israelgo herritartasunak ditu, eta 2023ko urriaren 7ko erasoaldian atxilotu zuten.

Azkenik, 37 urteko beduino bat askatu dute zeremonia pribatu batean. Hisham al Sayed izeneko beduinoa 2015etik zegoen bahituta.

602 preso palestinar askatu

Sei bahitu horien truke, 602 preso palestinar geratuko dira aske. Gehienak 2023ko urriaren 7tik aurrera atxilotu zituzten. Tartean daude biziarteko kartzela-zigorra duten 50 palestinar eta zigor luzeak dituzten beste 60.

Hala ere, ez dituzte gaur askatuko; izan ere, Israelgo Gobernuak igandeko 20:00ak arte atzeratu du preso palestinarren askatzea (19:00ak Euskal Herrian), Benjamin Netanyahu Israelgo lehen ministroa buru duen segurtasun-bilera bat amaitu arte, alegia.

Asteburu honetan egingo den trukearekin amaituko da su-etenaren lehen fasea, astebete barru. Oraindik ez dago akordiorik bigarren faserako.

Horren harira, Abdul Latif al Qanou Hamasen bozeramaileak berretsi du mugimendu palestinarra bide beretik jarraitzeko prest dagoela, "gerra amaitzeko, okupatzaileek alde egiteko eta Gazako Zerrenda berreraikitzeko".