Frantziako Fiskaltzak zazpi urteko kartzela-zigorra eskatu du Sarkozyrentzat libiarren finantziazioaren harira

Frantziako Fiskaltzak zazpi urteko espetxe zigor irmoa eskatu du Nicolas Sarkozy Frantziako presidente ohiaren aurka, 2007an Eliseora eraman zuen hauteskunde-kanpaina Muamar Gadafiren erregimenak finantzatu ziola argudiatuta. 

Sarkozyrena da hamabi akusatuen aurka eskatutako zigorrik gogorrena. Urtarrilaren 6an hasi zen prozesua, eta Ministerio Publikoak uste du frogatuta geratu dela haien erruduntasuna.

Fiskaltzak kartzela zigorra eskatu du hiru ministro ohiren aurka ere: Claude Gueant (sei urte), Brice Hortefeux (hiru) eta Eric Woerth (bat).

Sarkozyk ez du adierazpenik egin auzitegitik atera denean, baina handik gutxira komunikatu bat zabaldu du, eskaera "gehiegizkoa" dela esanez, baita errugabea dela eta "bidegabekeriaren biktima" dela ere.

"Egiaren alde urratsez urrats borrokatzen jarraituko dut, eta auzitegiaren zentzutasunean sinesten", gaineratu du presidente ohiak. 

Kartzela zigorrarekin batera, 300 000 euroko isuna ere eskatu dute haren kontra.

Jean-Michel Darrois abokatuetako batek erabat errefusatu du fiskalen eskaera, "epaiketan erakutsi denarekin zerikusirik ez duelako".

"Ez da finantziazio arrastorik aurkitu", berretsi du Darroisek prozesua jarraitu duen prentsari egindako adierazpen labur batean.

Sarkozyren beste abokatu baten, Christophe Ingrainen hitzetan, epaiketan ikusi denerako, Fiskaltzak "gehiegizko eta oinarririk gabeko zigorrak" eskatu ditu. 

Astearte eta asteazken bitartean aurkeztutako ondorioetan, Fiskaltzak frogatutzat jo du Sarkozyk (2007tik 2012ra bitartean presidente izan zena) "agindu eta enkargatu"  zuela Gadafiren erregimen diktatorialarekin egindako ituna, "ustelkeria itun" gisa definitu duena.

Eta helburu horren testuinguruan kokatu ditu Gueantek, Sarkozyk eta Hortefeuxek 2005eko urritik abendura bitartean Tripolira egin zituzten bisitak.

Akusazioaren arabera, azken bisitan, Hortefeuxek (ondoren Sarkozyrekin Barne ministroa) 2007. urteko kanpainarako ordainketak egin zituzten kontu-zenbakia eman zion Abdala Senoussi Gadafiren koinatuari. 

Senoussi Libiako zerbitzu sekretuen buru ere bazen orduan, eta biziarteko kartzela-zigorra ezarri zioten Frantzian -auzi-ihesean dagoen arren-, 1989an 170 hildako eragin zituen Afrikako bidaiari-hegazkin frantses baten aurkako atentatuaren erantzule gisa.