Erresuma Batuak gaur jarri du martxan Europako herritarrentzako Bidaiatzeko Baimen Elektronikoa

Asteazken honetatik aurrera, Erresuma Batura bidaiatu nahi duten Europako herritar guztiek Bidaiatzeko Baimen Elektronikoa (AEV edo ETA, ingelesezko sigletan) tramitatu beharko dute. Neurri horrek bisaturik gabe edo legezko bizilekurik gabe herrialdean sartzen diren bidaiariei eragingo die, eta turistei zein sei hilabetetik beherako egonaldia egingo duten ikasle eta negozio-bisitariei aplikatuko zaie.

Zer da Bidaiatzeko Baimen Elektronikoa?

Erresuma Batura bidaiatu aurretik telematikoki lortzen den nahitaezko baimena da. Erresuma Batuko Gobernuaren webgunearen bidez edo UK ETA aplikazioaren bidez bideratzen da. Baimena emandakoan, bi urteko indarraldia izango du, eta sarrera anitz egin ahal izango dira, gehienez sei hilabeteko egonaldiekin.

Eskaeraren hasierako kostua 10 libera (12 euro inguru) izango da, eta datozen hilabeteetan 16 liberara igotzea aurreikusten da (19 euro inguru). Baimena onartu arte ordu batzuk edo egun pare bateko tartea izan daiteke.

Nork behar du Bidaiatzeko Baimen Elektronikoa?

Europar Batasuneko hiritarrek, adin txikikoek barne, baimen elektronikoa beharko dute turismo, negozio eta ikasketa arrazoiengatik Erresuma Batuan sei hilabete baino gutxiagoko egonaldiak egiteko.

Halaber, Erresuma Batuan eskala edo geldialdia egiten duten bidaiariek ere behar izango dute baimena, baldin eta maletak berriro fakturatu edo mugako kontrola pasatu behar badute.

Salbuespenak

- Erresuma Batuan eskala edo geldialdian egin eta maleta berriro fakturatu edo muga kontrola pasatu behar ez dutenak.

- Dagoeneko bisa-baimena dutenak.

- Erresuma Batuan bizileku baimena dutenak.

- Irlandako pasaportea dutenak.

Eragina eta gomendioak

Baliteke aplikazioaren lehen egunetan atzerapenak izatea. Eragozpenik ez izateko, baimena behar besteko aurrerapenarekin eskatzea gomendatzen da, eta Erresuma Batura joan aurretik onartu dela ziurtatzea.