Israelek iragarri du Gazako hegoaldean eraso egingo duela, eta "guneak anexionatuko" dituela

Israel Katz Israelgo Defentsa ministroak iragarri du Gazako Zerrendaren hegoaldeko erasoak zabaltzen ari direla, "terroristen eremua desagerrarazteko eta garbitzeko", eta ohartarazi du "Israelgo Estatuko segurtasun eremuekin bat egingo duten eremu zabalak" hartuko dituztela. Praktikan, Gaza militarki okupatzeko asmoa berresten du erabakiak.

"Boterea eta Ezpata operazioa zabaltzen ari gara, Gazako herritarrak borroka eremuetatik ebakuatuz, terroristen eta azpiegitura terroristen eremua zapalduz eta garbituz", Israelgo ministroaren komunikatuaren arabera.

Bart gauean Khan Yunis eta Rafah hegoaldeko puntuen aurkako erasoak izan dira, Palestinako komunikabideek jakitera eman dutenez.

Sanad albiste-agentziak aipatu du gutxienez hamahiru pertsona hil dituela Israelek goizaldean Khan Yunis hiriko etxe baten aurka egindako aireko erasoan.

Israelek UNRWAren klinika bati eraso dio Jabalian

Gainera, Israelek gutxienez 22 pertsona hil ditu, tartean hainbat haur, Errefuxiatu Palestinarrentzako Nazio Batuen Agentziaren (UNRWA) klinika baten aurka egindako bonbardaketa batean, Jabalian, Zerrendako iparraldean.

Gazako Gobernuak salatu duenez, "genozidioaren" jarraipena da, eta hildakoen artean gutxienez 16 haur, emakume eta adineko daude, baita "zauritu asko" ere, horietako batzuk, larri.

Azpiegitura horren aurkako erasoarekin, desplazatuen 228 zentro eta babesleku izan dira Israelen erasoen jomuga, eta horrek "gatazketan zehar zibilen babesa bermatzen duten nazioarteko itun guztiak modu urratzen" ari direla agerian uzten du, Gazako agintarien arabera.

"Nazio Batuen erakunde bateko osasun-klinika bati eraso egitea gerrako krimena da, eta nazioartean kontuak ematea eskatzen du, lehenbailehen. Kezka handiz ari gatzaie begiratzen Israelen okupazio eta erasoei, zibilen eta azpiegituren aurkako sarraski masiboak eta eraso sistematikoak etengabe zabaltzen ari dira", gaineratu dute Gazako buruzagiek.

Palestinako Atzerri Ministerioak "irmo" gaitzetsi du klinikako "sarraskia", eta "oso kezkatuta" agertu da Israel Katz Israelgo Defentsa ministroak eguneko lehen orduan egindako adierazpenekin.

"Israelgo Gobernuak Gazan okupazio militarra zabaltzeko, 'tapoi-eremuak' hedatzeko eta bertako bizilagunak lekuz aldatzeko dituen egitasmoen aurka ohartarazten dugu. Horrez gain, Zerrendaren aurkako blokeo zorrotza, mugako pasabideak ixtea eta gosearen, egarriaren eta giza bizitzarako oinarrizkoenak diren premien gabeziaren politika", salatu ditu ministroak ohar batean, X sare sozialean.

Sarraskian 50.400 palestinar hil dituzte dagoeneko, gutxienez

Gazako Zerrendako agintariek jakinarazi dutenez, Israelek 50.400 palestinar baino gehiago hil ditu 2023ko urriaren 7tik. Osasun Ministerioak ohar baten bidez jakitera eman duenez, 50.423 lagun hil eta 114.638 zauritu direla baieztatu dute.

1.066 pertsona hil eta 2.597 zauritu dira martxoaren 18tik, Israelek urtarrilean lortutako su-etena hautsi eta erasoaldia berrabiarazi zuenetik.

Hala ere, "hondakinen azpian eta kaleetan botatako biktimak daude oraindik, anbulantziak eta Babes Zibileko ekipoak ezin direlako haiengana iritsi", Israelgo Armadaren erasoen ondorioz, eta, beraz, biktimen kopurua askoz handiagoa izango ote den beldur dira.