Herritartasuna lortzeko migratzaileen arteko lehia 'reality' bat baimentzea aztertzen ari dira AEBn

Donald Trump Ameriketako Estatu Batuetako presidentearen Gobernua aztertzen ari da reality polemiko baten ekoizpena baimentzea. Saio horretan, pertsona etorkinak AEBko herritartasuna irabazteko hainbat erronkatan lehiatuko lirateke, baina funtzionarioek esan dute oraindik ez dutela proposamena onartu.

Erresuma Batuko The Daily Mail egunkariak jakitera eman duenez, Kristi Noem AEBko Segurtasun Departamentuko idazkariak sari gisa herrialdean hiritartasuna lortzea helburu duen realityari babesa eman dio dagoeneko.

Hala ere, Tricia McLaughlin idazkariordeak gezurtatu egin du hori, eta ostiral honetan igorritako ohar batean esan duenaren arabera, "hori guztiz faltsua da". "Noemek ez du fikziozko edo telerrealitatezko saio baten proposamena babestu", erantsi du. Are gehiago, Noemek "ez du saioaren berri", ziurtatu du McLaughlinek.

"Herri honetan abertzaletasuna eta betebehar zibikoa sendotu behar ditugu, eta gustura aztertzen ditugu proposamen originalak. Proposamen honek ez du onespenik jaso", azaldu du idazkariordeak.

Oro har, Rob Worsoff ekoizleak The Wall Street Journal egunkariari azaldu dionez, saioa "estatubatuarra izatearen eta Estatu Batuetako herritar izatearen pribilegioaren ospakizuna" litzateke.

"Ez da 'Gose Jokoak' etorkinentzat izango", esan dio The Wall Street Journal egunkariari. "Hau ez da: galtzen baduzu, itsasontziz kanporatuko zaitugu herrialdetik", nabarmendu du.

Egunkari horren arabera, McLaughlinek adierazi du proiektuaren azterketa "lehen fasean" dagoela, eta "proposamen bakoitza ebaluazio prozesu zorrotz baten mende dago, onartu edo atzera bota aurretik", azaldu du.

AEBko tradizio eta ohituretan oinarritutako probak

The New York Times egunkariaren arabera, saio berriko probak AEBko ohituretan eta tradizioetan oinarrituko lirateke.

AEBko historiari, politikari eta bizimoduari buruzko galderak erantzun behar dituzte herritar izateko hautagai guztiek herritartasun azterketan.

Realityaren proposamena departamentu horren bulegoetara iritsi da, Trump urtarrilean agintera itzuli ostean, immigrazioaren aurkako politika gogor baten promesarekin, tartean deportazio masibo eta "historikoa" egingo zuela esanez.

Aste honetan, Administrazioak Trumpen agindu exekutibo bat defendatu zuen Gorte Gorenean, jaiotza-eskubideagatik herritartasuna mugatzeko eta agiririk gabeko edo herrialdean aldi baterako bisak dituzten gurasoen seme-alabei ukatzeko. Migration Policy Institute erakundearen ikerketa baten arabera, horrek urtero ehunka mila umeri eragin diezaieke.