Trumpek adierazi du Putin "erabat erotu" dela eta "beharrik gabe hiltzen" ari dela Ukrainan

Donald Trump AEBko presidenteak adierazi duenez, Vladimir Putin Errusiako presidentea "erabat erotu da" eta "jende pila hiltzen ari da beharrik gabe, eta ez naiz soldaduez bakarrik ari".

"Vladimir Putinekin oso harreman ona izan dut beti (...), baina zerbait gertatu zaio", adierazi du Trumpek Truth Social sarean egindako argitalpen batean. "Tripulaziorik gabeko misilen eta hegazkin bidez erasoak egiten ari dira Ukrainako hirien aurka, inolako arrazoirik gabe", gaineratu du.

Etxe Zuriko maizterrak ohartarazi du "Errusia eroriko" dela "Ukraina osoa" nahi badu, "ez zati bat soilik" .

Izan ere, Trumpek Volodimir Zelenski kritikatu du, "bere herrialdeari ez baitio mesederik egiten hitz egiten duen bezala hitz egiten. Bere ahotik ateratzen den guztiak arazoak sortzen ditu, ez zait gustatzen, eta hobe dut gelditzea". Zelenskik berak salatu zuenez, "Amerika isilik egoteak eta munduko beste batzuk isilik egoteak, Putinen alde egiten du".

Azkenik, AEBko agintariak Joe Bideni egotzi dio Ukrainako gerraren errua, eta berretsi du gatazka belikoa "ez zatekeen inoiz hasiko ni presidente izan banintz".

"Zelenskiren, Putinen eta Bidenen gerra da hau, ez Trumpena, ni sute handiak itzaltzen laguntzen ari naiz, gaitasunik ezaren eta gorrotoaren karietan hasi baitira", gaineratu du.

"Gainkarga emozionala"

Kremlinek ez ditu AEBko presidenteak Putini buruz esandakoak kritikatu nahi izan, eta iradoki du uneotan "gainkarga emozionala" handia dela eta horrek "erreakzio emozionalak" eragiten dituela.

Errusiako presidentearen bozeramaileak, Dimitri Peskovek, adierazi du Errusiako presidentea "herrialdearen segurtasuna bermatzeko beharrezko neurriak" hartzen ari dela, eta "lorpen handi"tzat jo du Trumpek abiatutako negoziazio prozesua. Horregatik, eskerrak eman dizkio.