Wildersen eskuin muturrak Herbehereetako koalizio Gobernua utzi du

Krisi hotsak, Herbehereetako koalizio gobernuan. Geert Wilders buru duen eskuin muturreko PVV Askatasunaren Alderdiak koalizio gobernua utzi du, bazkideen artean asilo politiken inguruko ikuspegi-aldeak direla eta. Eskuineko hiru alderdirekin koalizio gobernua osatu dute pasa den udatik eta alderdi ultraeskuindarrak gehiengoa zuen.

Eskuin muturreko politikariak X sare sozialean argitaratutako mezu batean iragarri duenez, gobernu akordioa aldatu ezean, Askatasunaren Alderdiak koalizioa utziko du. Aipaturiko akordioa aldatu eta asilo-eskatzaileen baldintzak gogortzeko hamar puntu gehitzea exijitzen zuen.

Hamar puntuko eranskina pasa den astearen hasieran publiko egin zuen Wildersek, eta horrekin batera gobernua haustearekin mehatxu egin zuen "aste gutxi barru" lortu ezean errefuxiatuen iritsiera mugatzea, mugak ixtea eta mugetako zaintza indartzea.

Igandean berriro koalizioa uztearekin mehatxu egin zien gainerako hiru alderdiei —liberalak, demokristauak eta nekazarien alderdi eskuindarra—, eskuin muturraren proposamen "gehienak" babestu ezean.

Atzo, astelehena, koalizioa osatu duten lau alderdiek bilera egin zuten Wilders buruzagiari azalpenak eskatzeko. Bileran, gainerako hiru alderdiek asiloa mugatzeko planen aurka egin zuten, baina eskuin muturreko Asilo eta Migrazio ministroaren gain utzi zuten horren ardura. 

Bilera egin eta biharamunean, koalizio gobernua uzteko erabakia hartu du Askatasunaren Alderdiak.

Erabakiaren ondorioz, Wildersen alderdiko bost ministroek dimisioa eman behar izan dute berehala. Ondorioz, kabinetea desegin da, baina gainerako gobernukideek jardunean jarraituko dute hauteskundeak egin arte.

Dagoeneko Dick Schoof Herbehereetako lehen ministroak dimisioa aurkeztu du, Wildersek koalizio-gobernua utziko duela iragarri eta gutxira.

Schoofek baieztatu du jarduneko lehen ministro gisa jarraituko duela hauteskundeak egin arte, eta PVVren erabakia "arduragabetzat" jo du, NOS irratiak jaso duenez.

Wildersen alderdiak irabazi zituen Herbehereetako hauteskundeak 2023an, baina ez zeukan gehiengo nahikorik bakarrik agintzeko. Hainbat hilabetez negoziatzen jardun ondotik, 2024ko uztailean, Askatasunaren Alderdiak koalizio gobernua osatzeko akordioa erdietsi zuen eskuineko beste hiru alderdirekin, Wilders lehen ministro ez izateko eta gobernuan kargurik ez izateko baldintzarekin.