Dozena bat herrialdetako herritarrei sarrera debekatuko die Trumpek; eta beste zazpi herrialdetakoei, mugatu

Donald Trump Ameriketako Estatu Batuetako presidenteak dozena bat herrialdetako (Birmania, Ekuatore Ginea, Haiti eta Iran, besteak beste) herritarrei AEBra sartzea debekatuko dien agindu bat sinatu du asteazken honetan; horrek, gainera, beste zazpi herrialdetatik joandako pertsonen egonaldiak mugatuko ditu. Neurri horiek joan den igandean Boulderren (Colorado) izandako atentatu terroristari erantzuna emateko direla justifikatu du Trumpek, eta datorren astelehenean, ekainak 9, sartuko dira indarrean.

"Afganistan, Birmania, Txad, Kongoko Errepublika, Ekuatore Ginea, Eritrea, Haiti, Iran, Libia, Somalia, Sudan eta Yemengo herritarrak AEBra sartzea erabat debekatzea erabaki dut", adierazi du buruzagiak hedabideei igorritako testu batean.

Debekuaz gain, Burundi, Kuba, Laos, Sierra Leona, Togo, Turkmenistan eta Venezuelako bisitarientzat murrizketa handiagoak egongo direla iragarri du Etxe Zuriko maizterrak.

Dokumentuak salbuespenak jasotzen ditu legezko egoiliar iraunkorrentzat, dauden bisen titularrentzat, bisa-kategoria batzuentzat eta "Estatu Batuen interes nazionaletarako" balio duten pertsonentzat.

Neurriak Estatu eta Segurtasun Nazionaleko departamentuek Estatu Batuekiko "jarrera oldarkorrei" buruz egindako txosten baten emaitza dira. Estatu Batuetako presidenteak bigarren agintaldiaren hasieran, joan den urtarrilean, dokumentu hori egitea agindu zuen.

Baliteke zerrendetan aldaketarik egitea, "egoerak hobera nabarmen egiten badu" adierazi du Trumpek Truth Social plataforman zabaldutako bideo batean. Era berean, gaineratu du mundu osoan mehatxuak sortzen diren heinean, gehitu ere egin daitezkeela.

Joan den igandean Boulderren (Colorado) izandako atentatuari erreferentzia eginez defendatu du iragarpena agintariak. Adierazi du atentatuaren egileak 2023ko otsailean iraungitako turista bisatua zuela.