AEBk eta Israelek Doha utzi dute, Hamasen azken proposamenari kritika eginez

AEBetako eta Israelgo negoziazio-taldeak Dohatik alde egin dute elkarrizketei buruzko mezu negatiboak helarazita. Steve Witkoff AEBen Ekialde Hurbilerako mandatari bereziak erretiratzeko agindua eman du, Hamasek Gazan su-etena lortzeko "borondate falta" duela eta.

"Hamasen azken erantzunaren ostean, gure taldea Dohatik kontsultetara ekartzea erabaki dugu, Gazan su-etena lortzeko borondate falta argi erakusten baitu", iragarri du Witkoffek X sare sozialean.

Estatubatuarraren hitzetan, bitartekariek "ahalegin handia egin dute", baina “ez dirudi Hamas koordinatuta dagoenik, ezta fede onez jokatzen ari denik ere"; horregatik, "alternatibak" aztertuko dituzte Israelgo bahituak askatzeko.

Aurretik, Israelgo gobernuak iragarri du bere ordezkaritza Jerusalemera itzuliko dela, mahai gainean jarri den proposamenari Hamasek eman dion azken erantzunaren ondorioz.

Israelgo lehen ministroaren bulegoak jakitera eman duenez, "Hamasek emandako erantzuna dela eta, negoziazio taldearen itzulera erabaki dugu, Israelen kontsultak egiten jarraitzeko".

Hamasek baieztatu du bitartekariei (Qatar, Egipto eta Ameriketako Estatu Batuak) igorri diela erantzuna goizaldean, baina ez du haren edukiaren berririk eman.

Mahai gainean jarri den akordioak 60 eguneko su-etena jasotzen du, eta, tarte horretan, Hamasek eta Israelek su-eten hori luzatzea eta iraunkor bilakatzea negoziatu beharko dute. Bestetik, bi hilabete horietan, Hamasek 10 bahitu askatu eta 14 hildakoren gorpuzkiak entregatu beharko lituzke, preso palestinarrak askatzearen truke.

Guztira, Hamasek 50 gatibu ditu oraindik. Israelek uste du horietatik 20 inguru bizirik daudela.

Bi aldeek bai bertatik bai atzerritik egiten dieten presio handiari egin behar diote aurre. Bitartean, Gazako egoerak okerrera egiten du etengabe, eta aireko eta lurreko erasoek ez dute etenik.

Gazako Zerrendako agintariek ostegun honetan argitaratu dutenez, dagoeneko 115 pertsona dira goseak eta desnutrizioak hildakoak.

Gai Humanitarioak Koordinatzeko Nazio Batuen Bulegoak ohartarazi duenez, "bildutako datuek erakusten dute gazatarren desnutrizioa oso muga kritikoetara iritsi” dela. "Desnutrizioa detektatzeko aztertutako 15.000 haurren % 16k muturreko desnutrizioa zuten", eta "% 95ek baino gehiagok bi elikagai talde edo gutxiago kontsumitzen dituzte".

Gazaren aurkako erasoaldia hasi zenetik 59.200 palestinar baino gehiago hil ditu Israelek, baina kopurua handiagoa izango dela uste dute nazioarteko erakundeek. Erasoaldia Hamasek 2023ko urriaren 7an egindako erasoei erantzuteko abiatu zen. Ordukoan, 1.200 israeldar hil eta 250 bahitu zituen Hamasek.