Rafahko pasabidea bihar zabalduko dute, Israelen arabera

Gaur zabaldu behar zuten, baina bihar irekiko dute azkenean Rafahko pasabidea. Israeldik igaro gabe Gazako Zerrenda eta kanpoaldea lotzen dituen sarbide bakarra da —Egipto eta Palestinako eremua lotzen ditu—, eta ia bi urtez itxita egon ondoren, gaur berriro irekitzekoa zen Israel. 

Benjamin Netanyahu lehen ministroak berak egin zuen iragarpena, su-eten akordioari jarrikiz, baina COGATek (Palestinako lurralde okupatuetan gai zibilak kudeatzen dituen Israelgo erakunde militarra) esan duenez, pasabidean "atariko prestaketen fase pilotua" egiten ari dira, eta, hortaz, palestinarrak ezin dira oraindik bertatik igaro.

COGATek EFEri bidalitako ohar baten arabera, "hasierako fase pilotua Europar Batasunaren Mugako Laguntzarako Misioarekin (EUBAM), Egiptorekin eta nahasitako eragile guztiekin koordinatuta" egiten ari dira.

Gazako Osasun Ministerioaren esanetan, Munduko Osasun Erakundeak (MOE) ez dio oraindik baimenik edo agindurik eman Gazatik atera beharrean dauden gaixoak mugitzeko. Guztira, iturri horren arabera, gaur 150 gazatar (50 gaixo eta 100 bat laguntzaile) atera behar ziren Rafahko pasabidetik. "Beraz, gaur ez da ebakuaziorik egongo, aurreikusitakoaren kontrara", iragarri du Ministerioak. 

Berriz ireki, baina oso modu mugatuan

Gauzak horrela, Israelgo iturrien arabera, astelehenean zabalduko dute Rafah. Aurreikuspenak betez gero, egunero 150 pertsona atera ahalko dira Gazako Zerrendatik , eta 50 bat sartu. COGATen hitzetan, pasabidea igarotzeko behar-beharrezkoa izango da Israelek aldez aurretik segurtasun baimena ematea, eta prozesua Europar Batasunaren misioak ikuskatuko du. 

Baimen horiek izanda ere, gazatarrek identifikazio prozesu gehiago igaro beharko dituzte Israelgo Armadaren kontrolpean dagoen eremu batean. 

Israelek erasoak areagotu ditu

Donald Trump AEBko presidenteak sustatutako su-etena dago indarrean Gazako Zerrendan, baina Israelek maiz urratu du, atzo bertan azkenekoz. Armadak bonbardaketak egin zituen desplazatuen eraikin eta kanpin-denda batzuen aurka, eta 32 pertsona hil zituen, 7 haur tartean. Gazako Osasun Ministerioak emandako datuen arabera, su-etena indarrean sartu zenetik, 520 gazatar baino gehiago hil ditu Israelek.

Su-etenaren lehen fasean zabalik behar bazuen ere, Rafahko pasabidea itxita mantendu du Israelek 2024ko maiatzetik. 

Israelen erasoaldiaren aurretik, Rafah ezinbesteko pasabidea zen Zerrendara merkantziak eta laguntza humanitarioa sartzeko. Hemendik aurrera, premiazko osasun arreta behar duten gaixoak ateratzeko erabiliko dute. MOEren arabera, 16.500 gaixo eta zauritu baino gehiago daude zain. 

Bestalde, gaur iragarri dutenaren arabera, Mugarik Gabeko Medikuak gobernuz kanpoko erakundea Gazako Zerrendatik atera beharko da otsailaren 28an. Israelgo Gobernuak eman du agindua, eta esan du talde humanitarioak ez diola berarekin lan egiten duten palestinarren zerrenda eman. 

Gobernuz kanpoko erakundeak ostiralean adierazi zuen, duda-muda askoren ostean, Israelek eskatutako zerrenda ez ematea erabaki zuela. Tel Avivek ez omen zien "bermerik eman" Palestinako lankide horiek jomugan jarriko ez zituztela. Israelgo Gobernuak erantzun du beharginen zerrenda horiek ez dituztela beste erakunde batzuekin partekatzen: "Barne helburuetarako bakarrik darabiltzagu".

Mugarik Gabeko Medikuek ohartarazi dutenez, erakundea Palestinako lurraldeetatik ateratzeak "ondorio oso kaltegarriak" izango ditu. Negu gorrian dago Gaza, eta Israelen okupazioak eta erasoek are gehiago gordindu dituzte bizi baldintzak. Horren kalkuluen arabera, urritik 500 gazatar hil ditu Israelek, eta osasun zerbitzua "ia deseginda dago". 2023ko urritik, 1.700 osasun langile eta Mugarik Gabeko Mendikuak erakundearen 15 kide erail dituzte.