Delorean: 'Alderdi esperimentalenean topatu dugu Laboarekiko lotura'
Delorean talde zarauztarrak Mikel Laboaren lanekin osatutako errepertorioa eskainiko du asteazkenean, otsailaren 10ean, Bilboko Arriaga antzokian, 20:00etatik aurrera.
Azken urteetan gure mugetatik kanpo entzute handiena lortu duen taldeetako bat da Delorean; poparen eta musika elektronikoaren arteko bere nahasketak onespen handia du, etengabe mundu zabalean zehar jotzen egoteak erakusten duenez.
Oraingoan, eskemak apurtuz, Mikel Laboaren ondareari hurbildu zaizkio taldekideak, “jatorrizko obraren eta moldaketaren arteko eremuan”, 2014an artista donostiarraren lana Adarra sariaz aitortzeko ekitaldian egin zuen bezala.
Orduan, Laboaren estudioko jatorrizko lanetan oinarrituz egindako zenbait nahasketa eskaini zituzten, eta bide horretan sakonduko dute Bilbon emango duten bigarren kontzertu honetan. Horren ostean, gitarrak erabat alboratuta sortu duten diskoa etorriko da.
Haiengana jo dugu, kontzertuaren atarian, haren inguruko zertzelada batzuk argi diezazkiguten.
Nola aukeratu duzue Mikel Laboaren errepertorio oparotik zer kantu sartu Arriagako kontzertuko kantuen zerrendan?
Laboaren katalogoa entzun eta moldatzeko interesgarrienak iruditzen zitzaizkigun abestiak aukeratu ditugu. Badira abesti klasikoak, baina bere alderdi esperimentalena hartu dugu ardatz.
Egokitzapenak egiteko Laboaren lanean sakonduta, zer ezaugarri nabarmenduko zenituzke bere musikagintzatik?
Bi alderdi daude: kanta tradizionalak eta saiakera esperimentalenak. Lehenengoa txikitatik ezagutzen genuen nolabait; bigarrena, aldiz, orain izan dugu entzun eta aztertzeko aukera.
Gure eta Laboaren arteko lotura alderdi esperimentalean topatu dugu; kanta tradizionalak ez zaizkigu horren moldagarriak iruditu, eta horrela izatea ongi iruditu zaigu, gainera.
Nola egin dituzue bertsioak? Zein neurritaraino errespetatu dituzue doinu originalak?
Batzuetan, "Bentara noa" abestian adibidez, jatorrizkoa dezente errespetatu dugu, baina oso askatasun handiz landu ditugu oro har.
Ez dugu uste moldaketa batek abesti originala errepikatu behar duenik. Moldaketaren eta originalaren artean dagoen eremu horretan aritu gara lanean.
2014an Laboari Adarra saria eman ziotenean, 45 minutuko kontzertua egin zenuten kantariaren estudioko grabazioak birnahasiz. Nolako harrera izan zuen? Zer berrikuntza ekarriko ditu Arriagako bigarren honek?
Harrera ona eduki zuen, guk uste: Laboaren familiari gustatu egin zitzaion, eta hori guretzat oso garrantzitsua da.
Arriagako kontzertuan, Donostian jotako abestiak eta espresuki idatzitako 30 minutu gehiago joko ditugu.
Zaila da, baina aukeratuko zenukete Mikel Laboaren kantu eta disko jakin bat?
Bada, bai, zaila da. Topikoa da, baina lehenengo biak disko oso bereziak direla esango genuke.
“Bat-hiru” Mikel Laboa ezagutzeko modu ona da, eta “Lau-bost”, ilunagoa izanik, disko aparta dela uste dugu. “Lekeitioak” ere entzun behar dira…
Aurrerago, jazza eta beste estilo edo instrumentazio modernoagoak ere landu zituen. Hainbat abesti aipatu genitzake erantzun honetan…
2016ko udaberrian disko berria argitaratuko duzue. Zer aurreratu diezagukezue berari buruz? Zein musika ibilbidetik joko du?
Bukatu berri dugun disko berriak soinu elektronikoagoa dauka. Gitarrak guztiz kendu ditugu.
Sintetizadoreekin lan egin dugu, testura elektroniko eta analogikoak asko landuz. Beti bezala, klubeko musika eta pop musika hartu ditugu euskarri gisa.
Zure interesekoa izan daiteke
Nafarroako Orkestra Sinfonikoak Lorca eta Falla batuko ditu Nafarroako Unibertsitateko Museoan
Nafarroako Orkestra Sinfonikoak Manuel de Falla konpositorea eta Federico García Lorca poeta batuko ditu De lo local a lo universal kontzertuan, otsailaren 5ean, Nafarroako Unibertsitateko Museoan (MUN). Musika proposamena Fallaren jaiotzaren 150. urteurrenarekin bat dator, eta XX. mendeko abangoardiak aztertzen ditu. Ignacio García-Vidalek zuzendutako entsegua bisitatu dugu.
Bad Bunnyk historia egin du Grammy sarietan, eta ICEren aurkako aldarria egin du: "Ez gara basatiak, gizakiak gara, eta amerikarrak"
Bad Bunny abeslari puertorricarrak ICEren ekintzak gaitzetsi ditu Grammy saria jasotzean: "Jainkoari eskerrak eman aurretik, ICE kanpora esango dut". Billie Eilishen hitzaldia ere argia eta zuzena izan da: “Inor ez da ilegala lapurtutako lurraldean”. Beste batzuek ere salatu zuten Trumpek migratzaileekin eta horren kontra protestatzen ari direnekin duen jokabidea.
Grammy sarien 68. edizioko palmaresa
Kendrick Lamarreck bereganatu ditu sari gehien Grabazio Arte eta Zientzien Ameriketako Estatu Batuetako Akademia Nazionalaren sarien gauean.
Grammy sariak irabazi dituzten artistek ICEren aurka egin dute oholtza gainetik
Grammy sarien 68. edizioa egin dute bart, Los Angelesen, eta Bad Bunnyk, Billie Eilishek eta beste hainbat artistak ICE kritikatu dute oholtza gainetik. Kendrick Lamarrek batu ditu sari gehien, eta Olivia Dean izendatu dute artista berri onena.
Bruce Springsteenek ICE Minneapolisen zabaltzen ari den indarkeriaren kontrako abestia argitaratu du
Streets of Minneapolis bi egunean idatzi eta grabatu du New Jerseyko musikariak, “hiria suntsitzen ari den Estatu-izuaren” aurrean, eta “bizilagun migratzaile errugabeei eta Alex Pretti eta Renee Goodi”, AEBko Immigrazio Kontrolerako eta Aduanetarako Zerbitzuaren esku hildako herritarrei, eskaini die.
Neil Youngek bere musika doan jarri du groenlandiarren eskura
Kanadar musikariak bere katalogoa Amazon Music plataformatik aterako duela ere iragarri du, eta kantu horiek eta hainbat film Groenlandiako herritarrei urririk lagatzea erabaki du, AEBren anexio mehatxuaren aurrean.
Elkar argitaletxea zigortu dute, Hertzainak taldearen kantuak baimenik gabe ustiatzeagatik
Donostiako merkataritza epaitegi batek 21.473,05 euroko kalte-ordaina aitortu die taldeko hiru kideri, “kalte ekonomiko eta moralagatik”. Epaia ez da irmoa, eta helegitea aurkez daiteke Gipuzkoako Auzitegian.
Zea Mays disko berria grabatzen hasi da, Ingalaterran
Errekaldeko taldeak hainbat kantu landu ditu Dave Izumi ekoizlearekin batera, eta grabazioa datozen hilabeteetan osatuko du, hainbat estudiotan, urte amaieran disko berri bat argitaratzeko helburuarekin. Laukoteak Dave Izumi ekoizlearekin (Billy Bragg, Natalie Imbruglia, James Bay...) lan egin du grabazioaren lehen fase honetan. Taldeak aurreratu duenez, lan berriak "etapa berri bat markatuko du taldearen ibilbidean, 30 urteko ibilbidera hurbiltzen ari baita".
Abian da Euskal Herriko Orkestra Barrokoa
Euskal Herriko eta kanpoko musikariez zein musika barrokoaren interpretazioan formatzen ari diren gazteez osatuta dago taldea. Otsailaren 26an Arriaga antzokian (Bilbo) eta otsailaren 28an Kursaalen (Donostia), "Masquarade" ikuskizuna aurkeztuko dute. Enrike Solinis zuzendari artistikoak gidatuta, entsegu irekia egin dute Galdakaoko Torrezabal kultur etxean.
Gontzal Mendibil: “Ekitea gustatzen zait, eustea baino gehiago”
Zeanuriko musikariak mende erdiko ibilbide musikala ospatuko du asteazkenean, urtarrilak 21, Arriaga Bilboko antzokian. Kantu zerrendan, ez dute huts egingo “Bagare”, “Herria maitatzeko” “Kapitalismoak” eta “Merezi ote”ren mailako kantu historikoek, eta abesti berriagoak ere entzungo dira. Aurrerago jarraipena izango duen formatu honetan (kontzertu gehiago egongo dira), zortzi musikari, bi korista, Beti Jai Alai dantza taldea eta Easo abesbatza izango ditu lagun Mendibilek. Emanaldiaren atarian, entsegu betean harrapatu eta berarekin hitz egin dugu, honetaz eta hartaz.