Musika Hamabostaldiak Pablo Sorozabal omenduko du ostegun honetan Arantzazun

"Haritza eta ihia. Sorozabali omenaldia" lelopean, musikari donostiarraren 125. jaiotza-urteurrena omenduko dute, eta Easo Abesbatzak eta Oñatiko Ganbara Abesbatzak Sorozabal gogora ekarriko dute.

Pablo Sorozabal. Argazkia: Donostiako Musika Hamabostaldia.

EITB MEDIA

2022/08/24 - 15:38

Azken eguneratzea

2022/08/24 - 15:40

Musika Aitzaki zikloaren baitan, Donostiako Musika Hamabostaldiak omenaldia egingo dio Pablo Sorozabali ostegun honetan Arantzazuko santutegian.

"Haritza eta ihia. Sorozabali omenaldia" lelopean, musikari donostiarraren 125. jaiotza-urteurrena omenduko dute.

Easo Abesbatzak eta Oñatiko Ganbara Abesbatzak Sorozabal gogora ekarriko dute eta euskal folklorean sustrai sakonak dituzten bere kantuetako batzuk interpretatuko dituzte, besteak beste "Zazpi lieder", "Bihotz bat", "Sagar dantza" eta "Bigarren kalez kale".

Gorka Mirandaren zuzendaritza artistikopean, diziplina ezberdinetako artistak izango dira, hala nola Iñaki Salvador eta David de Oliveira pianistak, Zerizan Txistu Taldea, Axular Gero Dantza Taldea, DAB konpainia, María Jaunarena eta Lorea López sopranoa, Luken Munguira tenorra, eta ikuskizuna gidatuko duen Eider Pérez aurkezle eta idazlea.

Pablo Sorozabal XX. mendeko musika sinfonikoko eta lirikoko konpositorerik nabarmenenetako bat da. Espainiar genero lirikoari ekarpen erabakigarria egin zion, batez ere zarzuelaren esparruan.