Frantziako Poliziak jaso ditu ETAren biltegietako armak

Frantziako Poliziak erretiratu ditu ETAren armategietako armak. 180 polizia eta jendarme ibili dira lanean, lehergailu-teknikariekin batera. Horrez gain, Auzitegiko Poliziaren ''hainbat agente'' eta Barne ministerioko segurtasun zerbitzuak ere bertan izan dira, Matthias Fekl Frantziako Barne ministroak prentsaurrekoan adierazi duenez.

Guztira, 120 suzko arma, hiru tona lehergailu eta hainbat kilo munizio eta detonagailu egon dira zortzi biltegitan gordeta, goizean "bakearen artisauak" taldeko kideek jakinarazi dutenaren arabera.

Aipatu biltegiak Akitania eta Okzitania eskualdeetan zeuden. Zehazki, armategi batzuk Araujuzon, Maslacq, Viellenave de Navarrenx eta Senpere (Lapurdi) herrietan zeuden, eta gainerakoak bi herri arteko zenbait gunetan: Etxarri (Zuberoa) eta Espiute herrien artean; Barkoxe (Zuberoa) eta Aramits artean; Audaux eta Castetbon artean, eta Lahontan eta Carresse-Cassaber artean.

Ordu horietan zehar, 172 behatzaile izan dira ETAk emandako kokalekuetan, Frantziako agintariek armak bildu bitartean.

Baionako ekitaldia

Gerora, arratsaldean, ekitaldi bat izan da Baionan. Bertan, gizarte zibil eta "bakearen artisauak" taldeko hainbat kidek zenbait adierazpen irakurri dituzte Pau Bert plazan. Horietan gaurko egunera iritsi arteko prozesuari eta etorkizunari buruz gogoeta egin dute.

Hitz egiten lehena Mixel Berhokoirigoin izan da. Berhokoirigoinek gizartearen eraikitzea eta urte luzez arerioak izandako gizarteko alderdien arteko bizikidetza izan ditu hizpide. "Elkarren artean bizitzen ikasi beharko dugu, iraganean aurkari izandakoak egungo etsaitzat hartzeari utzi".

(Mixel Berhokoirigoin, Baionako arratsaldeko ekitaldian. Argazkia: EFE)

Deialdian milaka pertsonak parte hartu dute, tartean hainbat ordezkari politiko eta sindikal. Bertaratu direnen artean egon dira, besteak beste, Arnaldo Otegi (Sortu), Pello Urizar (EA) eta Pili Zabala (Podemos) eta ezker abertzaleko kide diren Joseba Alvarez, Pernando Barrena eta Marian Beitialarrangoitia, baita Adolfo Muñoz (ELA) edota Garbiñe Aranburu (LAB) ere.

Horrez gain, pantaila erraldoi batean arma biltegien irudiak erakutsi dituzte, baita eta larunbat goizean bakearen artisauen eta Nazioarteko Egiaztatze Batzordeko kideen artean izandako bileraren artekoak ere.

(Baionako arratsaldeko ekitaldia. Argazkia: EFE)

ETAk emandako armategia

ETAk zortzi armategitan gordetako 120 suzko arma, hiru tona lehergailu eta milaka detonagailu eta munizio utzi ditu Frantziako agintarien esku, Michel Tubiana "bakearen artisauak" taldeko kideak goizean jakinarazi duenaren arabera. Jarraian azaldu duenez, "bakearen artisauek" ETAren zortzi biltegiren kokapenaren berri eman diote Nazioarteko Egiaztatze Batzordeari. "Frantziako agintarien aurrean burututako urratsa bidezko bake iraunkorra bermatuko duen prozedura baten baitan ematea eskatu diegu", gaineratu du.

Ondoren, Ram Mannikalingam Nazioarteko Egiaztatze Batzordeko koordinatzaileak agerraldia egin du Baionan eta, bertan adierazi duenez, Frantziako Poliziak dagoeneko badu ETAren armategien kokapenaren berri. Mannikalingamek azaldu duenez, Frantziako agintariak arduratuko dira armategietan dauden ETAren armak bildu eta egiaztatzeaz. Nazioarteko Egiaztatze Batzordeak ez du fase horretan parte hartuko.

(Aktibisten argazkia, Nazioarteko Egiaztatzaile Taldeak zabalduta. Argazkia: EFE)

(Frantziako Polizia agenteak armategietan lanean. Argazkia: EFE)

Erreakzioak

Iñigo Urkullu lehendakariak, Ram Mannikalingamekin batera, agerraldia egin du Donostian ETAren armagabetzeari buruz balioespen instituzionala egiteko. Agerraldi hori "epikatik etikara" esanez hasi du, eta gaineratu du armagabetzearekin "armak klandestinatearen eremutik legaltasunaren eremura pasa" direla. "ETAren armagabetzea edozein epikatik salbuetsita" dagoela nabarmendu lehendakariak, "baina esanahi etiko nagusi bat" duela gaineratu du: "Behin betirako ziurtatzen du ETAk eragindako biktima bakar bat ere ez zuela inoiz eragin behar, inoiz ez".

Bere aldetik, Nafarroako Gobernuak ere ETAren armagabetzeari buruzko balorazioa egin du. Hartara, "armagabetzea hiritarrek luzaroan eskatutako agindua" izan dela nabarmendu du Foru Exekutiboak ohar batean. "Armagabetzea zorrotz eta legez egin zedin laguntzeaz gain, erabatekoa, behin betikoa eta egiaztagarria" izango zela ziurtatzeko lan egin du Nafarroako Gobernuak. Azken finean, gizarteak urtetan adierazitako nahia ez zapuzten saiatu dela azpimarratu du.

Espainiako Gobernuaren aburuz, ETAren armagabetzea "porrota disimulatzeko operazio mediatikoa" da eta "interes politikoa ateratzen saiatzeko". Ohar batean, errefusatu egin du ETAk emandako armamentuari buruzko baloraziorik egitea, Frantziako agintariek eta justiziak aztertu arte, indarrean dagoen legediarekin bat eginez. Halaber, armagabetzea iragarri zenetik gobernuko kideek esan duten moduan, ETAko kideek ezin dutela Gobernuaren aldetik inolako tratutik espero errepikatu du, "are gutxiago delituen inpunitatea".

Frantziako Gobernuaren jarrera azaltzeaz Matthias Fekl Barne ministroari egokitu zaio. Bere hitzetan, ETAk zortzi armategien kokapena ''modu aldebakarrean''eman izana "aurrerapauso handia" da eta, horri lotuta, ministroak ''biktima guztiak'' gogoratu ditu, bereziki Espainiako poliziak eta guardia zibilak.