Kataluniako Parlamentuak onartu egin du erreferendum legea

Kataluniako Parlamentuak onartu egin du urriaren 1eko erreferendum independentista deitzeko oinarri hartuko duten legea, JxSi koalizioak eta CUPek alde bozkatuta. Ciudadanosek, PSCk eta PPCk ez dute parte hartu bozketan.

Legearen izapidetzea egun bakarrean egin dute: 09:00etan hasi da saioa, eta 21:30ean bukatu. Hori bai, liskar ugari izan dira, eta saioa hainbatetan gelditu behar izan dute, Ganberako Mahaia biltzeko.

Azkenean, JxSik, CUPk eta Germa Gordo talderik gabeko diputatuak erreferendum legearen alde bozkatu dute, Catalunya Si Que Es Pot abstenitu egin da, eta Ciudadanosek, PSCk eta PPCk ez dute bozketan parte hartu. Ganberatik joan dira, eserlekuetan Kataluniako eta Espainiako banderak utzita.

Lluis Corominasek (JxSi) legearen onartu izanaren garrantzia azpimarratu du: "Gaur ez da ezer amaitzen, gaur hasten da dena". Eta gogoratu du erreferenduma antolatzea giza eskubideak eta herrien oinarrizko eskubideak babeste  dela.

Anna Gabrielek (CUP) esan du Kataluniak autonomiatik subiranotasunera igarotzeko legea onartu duela eta orain Kataluniako Gobernuaren esku dagoela erreferenduma egitea edo ez: "Zuei dagokizuen ardura zuon gain hartzen  baduzue, ez izan zalantzarik herritarrek egin behar dutena egingo dutela eta bozkatzera joango direla".

Germa Gordo talderik gabeko diputatuak legearen alde bozkatu badu ere, Kataluniako Gobernuari eta erakundeei Estatuarekin hitzegiteko deia egin die eta erreferendumaren galderatik "errepublika" hitza kentzeko eskatu du.

(Carles Puigdemontek erreferendumaren deialdia sinatu duen unea. Argazkia: EFE)

Erreferendumerako deialdia

Carles Puigdemont Generalitateko presidenteak eta Kataluniako Gobernuko kideek 23:35ean sinatu dute urriaren 1eko erreferenduma deitzeko dekretua.

Kataluniako Parlamentuan erreferendum legea onartu eta Kataluniako Buletin Ofizialean argitaratu ostean egin dute sinadura ekitaldia.

Deialdia sinatuta, Puigdemontek agerraldia egin du Parlamentuko auditorioan bere gobernuko kontseilariak ondoan zituela. Kataluniaren erabakitzeko eskubidea "azkeneraino" defendatuko duela eta erreferendumaren emaitza "loteslea" izango dela azpimarratu du.

Ildo horretan, herritarrei urriaren 1eko erreferendumean bozkatzeko deia egin die.

"Herritarren erabakia loteslea izango da Kataluniako Gobernuarentzat, hala izan behar duelako; azkeneraino defendatuko dugu katalanek bozkatzeko eta erabakitzeko duten eskubidean, eurak baitira euren etorkizuna erabaki behar dutenak. Kataluniak demokratikoki erabakiko du bere etorkizuna urriaren 1ean", azpimarratu du.

Erreferendum legea onartuta, hurrengo urratsa iragankortasun juridikorako legea onartzea izango da, Kataluniaren deskonexioa gauzatu eta independentzia aldarrikatzeko, betiere urriaren 1ean baietzak irabaziz gero.

Tramitera onartu dute legea, egunaren azken orduan, baina eztabaida eta bozketa datozen orduotan egingo dute.

Mahaiak onartu du, eta saioaren bigarren egunean -osteguneko 10:00etatik aurrera- eztabaidatzea eta bozkatzea espero da.

(Ciudadanos, PSC eta PPC taldeetako diputatuak ganberatik atera dira. Argazkia: EFE)

Ciudadanosek "zentsura mozioa" iragarri du

Ines Arrimadas Ciudadanosek Katalunian duen buruak iragarri du oposizioko gainerako taldeekin harremanetan jarriko dela, Carles Puigdemont Generalitateko presidentearen aurka zentsura mozioa sustatzeko. "Hauteskundeak deitzea" da helburua.

Prentsaurrekoan, Arrimadasek adierazi du "talka" saihestu nahi duela: "geratzen zaigun bide bakarra da".

Parlamentuko eztabaidan, Kataluniako autonomia arriskuan jarri izana egotzi die Arrimadasek Junts pel Si eta CUP taldeetako diputatuei. "Oposizioak ordezkatzen dituen herritarren eskubideak zapaldu dituzte. Zer ulertzen duzue demokraziaz?", galdetu die.

Miquel Icetak (PSC) esan du Kataluniako Estatutua dela erreferendum legearen "lehendabiziko biktima", Kataluniako legediaren kontrako "erasoa" delako gaur onartutako araua. Kataluniako herritarren batasuna ere arriskuan jarri dutela adierazi du.

Lluis Rabellek (SiQueEsPot) Espainiako Gobernuaren eta PPren jarrera gogor kritikatu du, baina, aldi berean, Junts pel Sik eta CUPek lege berria tramitatzeko modua salatu du. "Generalitatea berrezarri zenetik hona demokraziari emandako kolperik larriena izan da", azpimarratu du.

Xavier Garcia Albiolek (PPC) esan du gaur onartutako erreferendum legeak ez duela inolako baliorik. "Zuok guztiok badakizue lege hau ez dela inoiz indarrean sartuko eta erreferenduma ez dela egingo, demokraziaren eta askatasunaren kontrako erasoa delako", ohartarazi die indar soberanistei.

Rajoyk Konstituzionalera joko du

Bestalde, Mariano Rajoy Espainiako Gobernuko presidenteak txosten bat eskatuko dio Estatu Kontseiluari, ostegun honetan bertan Auzitegi Konstituzionalean helegite bat aurkezteko.

Rajoyk Ministroen Kontseilua bilduko du ostegun honetan bertan, eta Pedro Sanchez PSOEko idazkari nagusiarekin ere batzartuko da.