Hezkuntza sektorean greba egiteko "batere arrazoirik ez" dagoela uste du Urkulluk

Hezkuntza sektorean greba egiteko "batere arrazoirik ez" dagoela uste du Iñigo Urkullu lehendakariak. ELA, LAB, STEILAS, CCOO eta UGT sindikatuek irailaren 15erako greba deitu dute, prebentzio neurriak eta kontratazioa negoziatzea eskatzeko, koronabirus pandemiaren aurrean eskolara "segurtasunarekin" itzultzeko.

Urkulluren ahotan, lanuztearen helburua "ez da diotena", Eusko Jaurlaritza berriari "kritika politikoa" egitea eta "giroa nahastea" baizik. Horregatik, elkarlanerako jarrera aldaketa bat eskatu du. "Guztiok elkarri laguntzeko" unea dela uste du agintariak, "aurretik sumatu ezin zen ustekabeko egoera" bati aurre egiteko.

Ikasturteari hasiera emateko orduan hezkuntza sektoreko eragileekin elkarrizketa falta izan dela ukatu du Urkulluk ETBn. Inbestidura saioan azaldu bezala, Eusko Jaurlaritzak "23 bilera egin ditu ekainetik", gogorarazi duenez.

Gainera, Jokin Bildarratz Hezkuntza sailburua iragan astetik ikastetxeekin, sindikatuekin eta patronalekin biltzen ari dela azpimarratu du Urkulluk, eta bilera-sortak astelehen honetan jarraituko duela erantsi du.

"Elkarrizketa badago, baita hiruki bat ere: osasuna, hezkuntza eta hezkuntza komunitatea; guztiek onena eman behar dugu haren baitan. Zalantzarik gabe, gauzak ongi egiteko interesik handiena Gobernuak berak du, eta jadanik jarri ditugunak baino baliabide gehiago bideratuko ditugu, eskura izatekotan", ziurtatu du.

Horregatik, lanuztearen deialdiari eustea ez du ulertzen. "Grebaren xedea ez da diotena, beste bat izan daiteke, Gobernuari kritika politikoa eta giroa nahastea", adierazi du. "Ez dago grebarako arrazoirik, ekainetik egin dugun lanagatik", nabarmendu du.

Lehendakariaren hitzetan, "Administrazioaren esfortzu etengabe eta iraunkorra dago". Era berean, "aurretik sumatu ezin zen ustekabeko egoera" honen aurrean, "guztiok elkarri lagundu behar diogu, auzolana" eskatu du. "Horrela, egoera kudeatzeko garaian gero eta hobeagoak izango gara, baita osasun arloan ere", nabarmendu du.

Gainera, bihar, asteartea, Felipe VI.a Espainiako erregeari estatu-eredua erreformatzeko "beharra" azalduko diola esan du Urkulluk, eta Euskadiren "berezitasuna" errespetatu eta "hobetzea" beharrezkoa dela esango dio.

Alberto Nuñez Feijoo Galiziako presidentea eta EAEko lehendakaria Zarzuela jauregian hartuko ditu Felipe VI.ak asteartean, iragan uztailaren 12an Galiziako eta Euskadiko hauteskundeak irabazi ondoren.

“Estatu autonomikoaren barruan” Euskadiren "berezitasuna islatzen jarraitzeko abagunea da" bilera, Urkulluren ustez, "berezitasun horren errespetuan hobetzea beharrezkoa delako". Horrela, "estatu-ereduaren erreforma bat" planteatuko dio.

Halaber, oraindik transferitzeke dauden eskumenak eskatu dizkio Urkulluk Pedro Sanchezen gobernuari. Lehendakariak ziurtatu duenez, Sanchezen exekutiboarekin "urratsak eman dira bide horretan" Euskadiren zorpetze-ahalmenari dagokionez, baita Gernikako Estatutua amaitzeko Ministroen Kontseiluak otsailean onartutako kronogramak dakarren "konpromisoari" dagokionez ere.

"Birzentralizazio zantzuak"

Ildo horretatik, aspaldidanik datozen "birzentralizazio zantzuak" salatu ditu Urkulluk, eta, pandemiaren ondorioz, osasun eta hezkuntza arloan ere "atzeman" direla ziurtatu du. Ondorioz, horrek "erne" egotera behartzen duela esan du.

Halaber, "Gernikako Estatutuan jasotako autogobernuaren berezitasunaren garrantzia" azpimarratu du, eta hori betetzeko eskatu du. "Zenbat eta autogobernu gehiago, orduan eta ongizate gehiago, eta horixe da, hain zuzen ere, lehendakari naizen aldetik eskatzen dudana", gaineratu du.

Horregatik, birzentralizatzeko "tentazioen" aurrean, "etengabe lan egin" behar dela esan du, eta Estatuarekiko aldebikotasuna eta "berme-sistema" jasoko duen Euskadirentzako Estatutu berri bat lortzeko beharra nabarmendu du.

Osasun eta Hezkuntza sailetan ez dela kudeaketa txarrik egon adierazi du Urkulluk

Bestalde, Urkulluk ukatu egin du Nekane Murga Osasun sailburu ohiak eta Cristina Uriarte Hezkuntza sailburu ohiak arlo horien inguruko "kudeaketa txarra" egin izana.

Ildo horretatik, eskerrak eman dizkie aurreko legealdian Eusko Jaurlaritzan izan diren sailburu guztiei eta haien taldeei, denbora horretan egindako "lan zorrotzagatik". "Denek ondo egin dutela uste dut", gaineratu du.

Lehendakariak azaldu duenez, "arrazoi pertsonalak" daude sailburu berriak aukeratzeko erabakiaren atzean, "baina baita etorkizunari begira aurretik dauden erronken eta errealitateen ardura ere".

Bestalde, Emakunde Lehendakaritzaren egituratik atera eta Berdintasun, Justizia eta Gizarte Politiketarako Sailera lekualdatzea "kontzientziazioan hobetzeko  borondatearekin" egin dutela ziurtatu du lehendakariak.