Kongresuak lehen pausoa eman du pilotako eta surfeko euskal selekzioak nazioartean lehiatu ahal izateko

Diputatuen Kongresuko osoko bilkurak Kirolaren Lege berria onartu du (aurrekoa 1990koa zen), 166 aldeko botorekin, kontrako 157rekin, eta 18 abstentziorekin, eta, hala, pilotako eta surfeko euskal selekzioek nazioartean lehiako ahalko dira modu ofizialean, Euskal Autonomia Erkidegoan (EAE) "sustraitze historiko eta sozialeko kirolak" diren heinean. 

Kongresuko Kultura eta Kirol Batzordeak joan den astean onartu zuen araudia, EAJk eta PSOEk adostutako zuzenketa bat erantsita. Horren arabera, lehen aldiz, kirol batzuetako euskal selekzioen ofizialtasuna aitortu zuten. Orain, Senatuan eztabaidatuko dute testua.

Baldintza horiek betetzen ez dituzten gainerako kirolek, ordea, orain bezala jarraitu beharko dute. Hots, euskal federazioak Espainiakoaren barruan egongo dira nazioarteko lehiaketa ofizialetan. Joko Olinpikoetan aritzeko aukerarik ez dute izango euskal selekziook, Nazio Batuek aitortutako estatuak bakarrik lehiatu ahal direlako. 

Espainiako Gobernuak nahi zuen adostasun maila lortu gabe, testua onartu egin dute ostegunean; 166 aldeko boto izan ditu, kontrako 157, eta 18 abstentzio. Orain, Senatura eramango dute; aurreko astean Batzordean onartutako testuarekin alderatuta, aldaketak oso txikiak izan dira.

Autonomia selekzioen gainean EAJk eta PSOEk duela egun batzuk adostutako zuzenketak eztabaida markatu egin du, eta taldeen botoa baldintzatu. Juan Luis Soto diputatu sozialistak aldeztu du legea; esan duenez, "berritzailea da, aitzindaria". 1990etik indarrean dagoena ordezkatuko du.

Testuak "adierazten du kirola egiteko eskubidea, eta kirola funtsezko jarduera dela dio". Berritasunak ditu "gobernantzan eta gardentasunean. Kirol justizia eredu berria bultzatzen du, zaleentzako bideak irekitzen ditu, eta kirolaren industriaren garrantzia nabarmentzen du". Hain zuzen, 400.000 pertsonari baino gehiagori ematen die lana, eta BPGaren % 3 da.

Sotok ziurtatu du lege hau dela "ez diskriminazioarena, LGTBI gizataldea babesten duena, arrazismoari txartel gorria ateratzen diona, eta intolerantziari. Inklusioaren legea da, berdintasunarena, kirolariaren estatutua bultzatzen duena, kontziliazioaren eta edoskitzearen eskubideak aitortzen dituena. Eta, gainera, selekzioetan, berdintasunezko sariak ematen dizkie gizonei eta emakumeei".

"Lege honekin, Espainia ez da apurtzen, tamalez entzun dugunez; alderantziz, kirola gizarte kohesioko tresna bihurtzen da", esan du.

PPko Javier Merinok legearen zati bat goraipatu du, emakumezkoen futbola bultzatu egiten duelako, animaliekin egindako jarduera blindatzen duelako, gardentasun handiagoa duelako bai eta gobernu oneko kodeak ere, "egunero lotsatzen gaituzten portaera jakin batzuk baztertzeko". Deitoratu du, baina, ezin zuela legea babestu, espainiar Gobernuak "parlamentuko oreka hautsi baitu".

Esan duenez, LaLiga, aurreko astean, "Moncloak sortutako polemika artifizial baten testuinguruan" haserretu zen zuzenketak kendu zituztelako ; benetako helburua zen, Merinoren iritziz, autonomia selekzioen kontua estaltzea: "Euskal selekzioetako arazoa lehen egunetik zegoen idatzita, baina Espainiako Gobernua beldur zen, zarata mediatikoa egongo zelako".

"Aukera paregabea zegoen, adostasunarekin hitzartzeko gure demokraziako hirugarren legea, baina espainiar kirola zuen gainetik dago. Haren ohoreak, haren historiak, izen-deiturak dituzte, eta horiek zuek egindako amore emateen gainetik daude", adierazi du.

Euskal taldeen iritzia

Legearen eztabaidan, Joseba Agirretxea EAJren diputatuak nabarmendu du pilotaren eta surfaren euskal selekzioen ofizialtasuna aitortzea "lehen pausoa dela, oinarrizkoa eta beharrezkoa", baina ohartarazi du ez dela "azkena" izango. "Orain arte ezereza genuen, eta orain, denaren eta ezerezaren artean, badugu zerbait", gaineratu du. Nabarmendu duenez, "tamalgarria da herrialde batek kirolari bat lehiatzera behartzea" —aipatu bezala, pilotariak edo surflariak ez diren gainerako kirolariak Espainiaren izenean lehiatu beharko dira—. 

Auziak eragindako "zarata" gorabehera, buruzagi jeltzaleak uste du kirolarien eskubidea dela, eta nabarmendu du pozik agertu direla horiek. Dena dela, legea bere osotasunean aztertuta, "Estatuaren injerentzia" salatu du, Konstituzioak autonomia erkidegoei eman baitzien kirol arloko eskuduntza guztiak. Hori esanda, balioan jarri du aurkeztutako eta onartutako zuzenketa guztiek testua "hobetu eta orekatu" izana. 

Mertxe Aizpurua EH Bilduko bozeramaileak aurreratu du ez diotela legeari baiezko botorik emango. Argudiatu duenez, pilotaren eta surfaren alorrean lortutakoa "pauso bat" da, baina ez da komeni jendea engainatzea. Aldarrikatu du Euskal Herria nazioa dela, eta, hortaz, bere selekzioa eduki behar duela. Gainera, azpimarratu du kirolariak ez direla "adingabeak" eta ez dela onargarria ezin izatea "zein banderaren eta zein herrialderen izenean" lehiatu nahi duten erabaki. 

Salatu duenez, pilotaren eta surfaren salbuespenak kenduta, legeak "Espainiarekin lehiatu nahi ez duten horiek zigortzea", eta hala, nabarmendu du bere taldeak Euskal Selekzioa aldarrikatzen jarraituko duela "lortu arte".

EAJren arabera, Junts akordioa "dinamitatzen" saiatu da

Bozketak EAJren eta Junts per Catalunyaren arteko eztabaida eragin du. Pilar Calvo talde katalanaren bozeramailea jeltzaleei zuzendu zaie, "Kataluniako independentismoaren ametsari betoa jartzeko Espainiako Ganberaren araudia erabili izana" deitoratzeko. Juntsek selekzio nazionalen parte-hartzea orokortzeko zuzenketa egin du, eta EAJk atzera bota.

EAJk erantzun dio Juntsek "historikoki errotuta" dauden selekzioak onartzeko akordioa, jeltzaleen eta sozialisten artekoa, "dinamitatu" nahi izan duela.

"EAJ-PNVk tramitazioari betoa jartzea eragin duen Junts per Catalunyaren proposamena akordio horren literaltasuna aldatuz eta dinamitatuz idatzi da, gai hori bera bere taldearen zuzenketa baten bidez bozkatuko denean (Junts alderdiaren 106 zuzenketa) eta EAJ-PNVren babesa duenean", esan du Euskal Taldeak.

"Are larriagoa da aurrera ateratzeko aukerarik ez duen proposamena bozkatzeko, lortzen zaila izan den akordioa arriskuan jartzea", gaineratu du.