Lehendakariak laguntza eskatu dio AEBko euskal diasporari, "aukerak" identifikatzeko

Lehendakariak Estatu Batuetara egin duen lehen bidaia ofiziala Washingtoneko euskal komunitatearekin topaketa eginda hasi du, Euskadiren eta Ipar Amerikako herrialdearen arteko lotura politiko, ekonomiko eta kulturalak indartzeko une garrantzitsu batean. Haien aurrean, Imanol Pradalesek euskal diaspora berriak estrategia horretan duen zeregin erabakigarria nabarmendu du, eta Euskal Autonomia Erkidegoa eta Estatu Batuen arteko zubi-lana egin dezan eskatu die: "Zuen ekarpena eta parte-hartzea behar ditugu. Ordezkatzen duzuen euskal diaspora berriaren bultzada behar dugu. Estatu Batuetan zuek gure antenak izatea nahi dugu, eta bidean sortzen diren aukerak guri identifikatzen laguntzea".

Pradalesek eskerrak eman dizkio Washingtongo euskal komunitateari Euskal Autonomia Erkidegoaren nazioarteko proiekzioari egindako ekarpenagatik eta Euskal Herriaren ondare kultural eta sozialak biziraun dezan egindako ahaleginagatik. Era berean, Euskal Autonomia Erkidegoak eta Estatu Batuek partekatutako balioen garrantzia azpimarratu du. "Inoiz baino indar handiagoz aldarrikatzen ditugu gu sortu gineneko balioak: Demokrazia, Bakea, Askatasuna, Segurtasuna, Berdintasuna eta Justizia Soziala. Amerikarrekin partekatzen ditugun balioak", nabarmendu du lehendakariak.

Lehendakariak berretsi egin du Euskal Autonomia Erkidegoak merkatu globalak integratzeko eta nazioarteko merkataritza defendatzeko egin duen apustua, aurrerapenerako eta ongizate komunerako bide gisa. Ildo horretan, "Euskadi Globala gure estrategiari jarraipena ematen diogu; izan ere, estrategia horrek Euskal Autonomia Erkidegoa herrialde gisa haztea, baita ongizatearen arloan ere, du helburu", adierazi du.

Lehendakariak, Euskal Autonomia Erkidegoak nazioarteko lankidetzarekin eta hesien ordez zubiak eraikitzeko duen konpromisoa berretsi du. Ziurgabetasunak baldintzatutako nazioarteko testuinguru batean, lehendakariak aliantzak indartzeko eta nazioarteko lankidetzaren alde egiteko beharra azpimarratu du. "Tentazio eta joera inperialisten, protekzionismo basatiaren eta bloke-politikaren aurrean, alde anitzeko akordioak defendatzen ditugu", nabarmendu du lehendakariak. Era berean, azpimarratu du bidaiaren helburua dela harreman transatlantikoa sendotzea eta aukera berriak zabaltzea esparru politikoan, ekonomikoan, enpresarialean eta sozialean.

Gaur, lehendakariak bilera garrantzitsuak egingo ditu Alderdi Errepublikanoko senatari James E. Rischekin eta jatorri euskalduna duen Alderdi Demokratako biltzarkide John Garamendirekin.

Jardunaldia enpresetako ordezkariekin egingo den topaketa batekin hasiko du, eta George Washington Unibertsitatean egingo den mahai-inguru batean parte hartuz amaituko du. Gainera, 2016an Kapitolioko Bakearen Parkean landatutako Gernikako Arbolaren kimua ere bisitatzea aurreikusi da.