Auzitegi Konstituzionalak Amnistia Legea babestu du, magistratu aurrerakoien aldeko botoekin

Auzitegi Konstituzionalaren osoko bilkurak babestu egin du Amnistia Legea, 6 magistratu aurrerakoien aldeko eta 4 kontserbadoreen kontrako botoekin. Astelehenean ekin zieten bilerei, eta 10 epaileek gaur egin dute bozketa. Bete egin da aurreikusitakoa: PPk jarritako helegitea atzera bota dute, osoko bilkura monografikoan.

Onartu den testuak Inmaculada Montalban magistratuak eta Auzitegi horretako presidenteordeak duela hiru aste aurkeztu zuen ponentziaren zirriborroa du oinarri. Bertan, oniritzia eman diote Amnistia Legeari.

Gaurkoa lehen epaia besterik ez da izan. Auzitegi Konstituzionalak 30 helegite inguru ditu ebazteko, eta, zalantzarik gabe, gaurkoak bidea zabaldu eta argitu die gainontzekoei.

Ebazpenak dio Espainiako Konstituzioan amnistiak tokia baduela, eta Amnistia Legea ez dela "arbitrarioa",  ezta "kapritxoa" ere. Horrekin batera, arauak jasotako artikuluek legea betetzen dutela ere erantsi dute.

Halaber, epaiak arrazoizkoa irizten dio Kataluniako prozesu independentistak hango gizartean eragindako arrakalak bere onera ekartzeko Amnistiaren Legean jasotako neurri-sortari, horien artean, isunak murrizteari. Epaiaren arabera, legeak elkarbizitza eta kohesio soziala eraikitzea erraztu du.

Diru publikoa bidegabe erabiltzearen delitua

Testuak ez du aipatzen diru publikoa bidegabe erabiltzearen delitua. Hortaz, gaurko ebazpenak ez die eragingo Carles Puigdemont eta Oriol Junqueras Generalitateko presidenteari eta presidenteorde ohiari, hurrenez hurren. Auzitegi Gorenak ez zituen amnistiatu diru publikoa bidegabe erabiltzearen delituagatik.

Konstituzionaleko epaileek legeak Konstituzioan tokirik duen edo ez aztertu dute; ez, ordea, zein kasutan aplikatu behar den.

Puigdemont, Oriol eta dirua bidegabe erabiltzeagatik zigortutako gainerako buruzagien kasuan, babes-helegiteak argitu arte itxaron beharko da, anministia aplikatuko zaien edo ez jakiteko. Gutxienez, udazkenera arte. 

Erreakzioak

Berehala hasi dira erreakzioak iristen. Gaiari buruz bere iritzia ematen aurrenetakoa Pedro Sanchez Espainiako Gobernuko presidentea izan da. "Albiste oso ona" dela esan du Europar Batzodera sartu aurretik egindako adierazpenetan, Bruselan. 

"Politika" aldarrikatu du buruzagi espainiarrak, Kataluniakoa eta horren gisako "gatazka zailak" bideratzeko. Bere ustez, gaurko epaiak "politikatik inoiz atera behar ez zen krisi politikoa" ixten lagunduko du. 

Felix Bolaños Espainiako Gobenuko Presidentetza, Justizia eta Gorteekin Harremanetarako ministroaren iritzian, berriz, "elkarbizitzaren alde Gobernuak egindako apustua" aitortzen du erabakiak. Nolanahi ere, nabarmendu du legea auzipetu guztiei ezarri arte, ez dela erabat amaituko prozesua. "Amnistia legezkoa da, konstituzionala da, bidezkoa da eta erabilgarria da, Katalunian bizikidetza jada errealitate bat delako", esan du, Kongresuan, prentsaurrean. 

Era beran, Salvador Illa Generalitateko presidente sozialistak ere txalotu egin du erabakia, eta azpimarratu du "legea ezartzeari oztopoak" jartzeak ez duela "zentzurik". Prozesuan zigortutako guztiei amnistia ezartzearen alde agertu da, eta, zentzu horretan, Auzitegi Gorenari eskatu dio legea bere horretan aplika dezala, "errespetuz, baina argitasunez". 

Imanol Pradales lehendakariak uste du Konstituzionalaren babesak "politikaren judizializazio dinamika kaltegarriari" bukaera eman diola, eta "elkarrizketaren, negoziazioaren eta akordioaren bidera" itzultzen duela Kataluniako gatazka politikoa. Gainera, EAEren gaitasun politikoak "areagotzeko" eta "autogobernu esparru berri bat" lortzeko defendatuko duten bidea dela ziurtatu du.

Bide beretik,  Sumar Mugimenduko Pablo Bustinduyk ere albiste ontzat jo du berria, "inoiz gertatu behar ez zena zuzendu" delako. "Mariano Rajoyren Gobernuak egin zuen hau,  Ongizate Estatua desegiten ari zen bitartean, mugimendu baketsu bat zapaldu zuen, eta prozesu demokratiko eta baketsu bateko buruzagi politikoak epaitegietara eraman zituen", azaldu du. 

Antzera mintzatu da Mertxe Aizpurua EH Bilduren Kongresuko bozeramailea ere. Horren hitzetan, urrats garrantzitsua da, "luzeegi jo" duen gatazkari amaiera emateko. 

Maribel Vaquero EAJk Kongresuan duen bozeramailearen ahotan, Kongresuan onartutako Amnistia Legearen espirituak "dimentsio osoan" jasotzen zuen gaia, eta, beraz, Konstituzionalak "amnistiarekin lotutako edozein delitu" libratu beharko luke. Gogorarazi duenez, EAJk beti defendatu du "gatazka politikoak esparru politikoan konpondu behar direla" eta horiek judizializatzea "hanka-sartzea" dela.

Kontrara, Alberto Nuñez Feijoo PPren presidenteak gogor kritikatu du Konstituzionalak ebatzitakoa, eta, amnistia "legez kanpokoa" dela esan ondoren, berriro auzitan jarri du auzitegiaren inpartzialtasuna. Are, gehitu du demokraziaren ikuspuntutik epaia "lotsagarria" dela, "ustelkeria politikoaren emaitza" izan baitzen.