Borja Semperrek minbizia duela eta tratamendua hasiko duela iragarri du

Borja Semperrek, Alderdi Popularraren bozeramaileak, minbizia duela iragarri du astelehen honetan hedabideen aurrean egin duen prentsaurrekoan. Azaldu duenez, "ohiko azterketa batean" atzeman diote tumorea. Hasierako fasean dagoela eta, ondorioz, pronostikoa "itxaropentsu" egoteko modukoa dela jakinarazi du.

Hori bai, "urtero ehunka espainiarrei gertatzen zaien bezala, tratamentu zorrotza" egin beharko duela jakinarazi du, eta adierazi tratamendu horrek haren "fisikoa aldatzea" eragingo duela, "nahiz eta hori ez den garrantzitsuena".

Egoera horrek bizitza profesionala aldatuko duela onartu du. Azaldu du litekeena dela aurrerantzean gutxiago agertzea hedabideen aurrean, "tratamenduak uzten dion heinean". Era berean, gaineratu du une honetan bere "esfortzu guztia sendatzera" bideratuko duela. 

Azkenik, familiaren, lagunen eta alderdiaren babesa duela esan du.

Albistearen berri izan ondoren, PPko buruzagiek, Pedro Sanchez Espainiako Gobernuko presidenteak berak, bere Exekutiboko kideek eta ezkerreko politikari batzuek X sare sozialaren bidez elkartasun mezuak helarazi dizkiote Semperri.

Sanchezek "animo eta indar handia" opa dio, eta "lehenbailehen sendatzea"; Felix Bolaños Presidentetza, Justizia eta Gorteekiko Harremanetarako ministroak, berriz, "besarkada handi bat" bidali dio, eta "eztabaida publikoan zu bezalako pertsonak behar ditugu", adierazi du.

Angel Victor Torres Lurralde Politikako eta Memoria Demokratikoko ministroak minbizia zuela jakinarazi zuen duela hilabete batzuk, eta hauxe idatzi du: "Eskarmentuagatik, badakit baikortasuna ezinbestekoa dela gaixotasun horiei aurre egiteko. Eta, batez ere, senide eta lagunak oso hurbil izatea".

Ezkerretik, Gabriel Rufian ERCk Kongresuan duen bozeramaileak "indar handia lagun", esan dio Semperri. Antonio Maillo IUko buruak elkartasuna adierazi dio PPko ordezkariari, "esperientzia komunak" izan dituztelako, eta adorea eta besarkada bidali dizkio, "anaitasunez". Gaixotasuna publiko egin izana eskertu dio Maillok, horrek “jende askori laguntzen diolako”.

PPren izenean, Alberto Nuñez Feijoo buruzagiak mezu bat idatzi du, Semperrekin batera ateratako argazki batek lagunduta: "Norberak ez ditu bizitzaren kolpeak aukeratzen, baina bai nola aurre egiten dien".

"Borja Semperrek bere bizitza osoan markatutako ausardiarekin egingo dio aurre orain egokitu zaionari, eta maite dugun guztiok izango gaitu ondoan", nabarmendu du Feijook. Miguel Tellado PPko idazkari nagusi berriak, berriz, Semper "erronka berri baten aurrean" jarriko dutela uste du, eta erronka horri "betiko sendotasunez" aurre egingo diola.

Euskadiko PPko presidenteak, Javier de Andresek, Semperri "animo, itxaropen eta ausardia", esan dio alderdiaren izenean.

Isabel Diaz Ayuso Madrilgo presidenteak "sendatzeko desiorik zintzoena" helarazi dio, orain hasi duen "minbiziaren aurkako borrokaren" aurrean: "Dena laster atzean uztea espero dut. Gure maitasun guztia".