PSE-EE "Euskadi gidatzeko prest" dagoela aldarrikatu du Anduezak

PSE-EEk Arrosaren Jaia ospatu du larunbat honetan Durangon, azken ediziotik zazpi urtera, Eneko Andueza idazkari nagusiaren mezu irmo batekin: "Euskal sozialistak prest daude Euskadi gidatzeko". Landakon egindako ekitaldi batean, Anduezak bere alderdia "euskal politikaren funtsezko zutabe" gisa eta "agenda instituzionala markatzen duten politika aurrerakoien berme" gisa jarri du.

Buruzagi sozialistak militante historikoak eta hildako buruzagiak gogorarazi, eta egungo politikaren "gidari eta erreferente" direla esan du.

"Euskadi ez litzateke berdina izango gu gabe", adierazi du Anduezak, PSE-EEk etxebizitzaren, garraio publikoaren, merkataritzaren, turismoaren eta giza eskubideen arloan bultzatutako neurriak nabarmenduta. Anduerazen hitzetan, sozialisten presentziak herritarren benetako arazoetan oinarritutako politikak bermatzen ditu.

PSE-EEk "ezker erabilgarria" eta "zentralitate politikoa" ordezkatzen dituela eta hauteskundeetako konpromisoak errealitate bihurtzeko gai dela azpimarratu du euskal sozialisten buruak.

Etorkizun instituzionalari dagokionez, Anduezak eskubideak eta askatasunak blindatzen dituen autonomia estatutu berri baten alde egin du, baina baztertu egin du independentziarako bide bat bilakatzea. "Eztabaida subiranista hilda dago", adierazi du.

PSE-EEko idazkari nagusiak azpimarratu du Euskadiren arazoak ez direla eskumen gehiagorekin konpontzen, daudenak hobeto kudeatuta baizik. Ildo horretan, osasun publikoa indartu, hezkuntza hobetu, Europako funtsekin industria-politika bultzatu eta etxebizitza-parke publikoa zabaldu behar dutela esan du.

Datozen udal eta foru hauteskundeei begira jarrita, Anduezak ez lasaitzeko eta PSE-EE "hitzez hitz konpromisoak betetzen dituen eta euskal herritarren alde lan egiten dakien alderdia" dela erakusten jarraitzeko deia egin die militanteei.

"Helburua argia da: Euskadik berriro lehendakari sozialista bat izatea", esan du Anduezak, bere alderdia "Euskadi hobekien ulertzen duena" dela sinetsita.

Pedro Sanchez Espainiako Gobernuko presidentea ahotan hartuta, azken krisiei errezeta sozialdemokratekin erantzuten jakin duen "munduko liderra" dela esan du.

Anduezak Espainiako Gobernu sozialistaren hainbat lorpen aipatu ditu, eta, besteak beste, pentsioak indartu, gutxieneko soldata igo, enplegua sortu eta energia sektorean "salbuespen iberikoa" lortu duela nabarmendu du.

Bestalde, PSE-EEko idazkari nagusiak eskuinaren aurka egin du, proiekturik ez izatea egotzita, eta PP "eskuin-muturreko boto-emaileen fabrika" bihurtu izana egotzi dio Alberto Nuñez Feijoori. Sozialistek, berriz, egonkortasuna eta kudeaketa ona ekarri dutela adierazi du.

"Palestina aske bat"

Palestinaren egoeraren inguruan ere hitz egin du Eneko Anduezak. Horrekin batera, Espainiako Gobernuak egindako lana eta hartutako erabakiak goraipatu ditu. Anduezaren ustez, sozialistak "lehenak" izan dira Palestinako estatua onartzen eta Israel Gazako Zerrendan egiten ari den "basakeria" salatzen.

"Genozidio deitzen diogu genozidioari, eta sarraskia sarraskiari. Esaten dugu behingoz geldi daitezela gerra eta indarkeria, ez direla irtenbidea. Euskal sozialistok inoiz baino indartsuago esaten dugu, ondo baitakigu zer den giza eskubideak urratzen saiatzea, norbait suntsitzen saiatzea. Nik Palestina aske bat nahi dut, bakean dagoen Palestina bat. Nahikoa da!", esan du.