Burujabetza handiagoa eta herritarren eskubideen bermea aldarrikatu ditu Gure Esku-k

Azaroaren 5a egun berezia da Gure Eskurentzat. Asteazken honetan Getxon egindako ekitaldi batean, plataformak gogoratu du gaur bezala, 1933an, egin zela autonomia estatutuari buruzko erreferenduma Araban, Bizkaian eta Gipuzkoan, eta duela zortzi urte, Getxon, Gure Eskuk sustatutako herri-galdeketa.

Efemeridea aprobetxatuz, plataformak ekitaldi bat egin du gaur eguerdian Getxon, Euskal Herriari "burujabetza tresna gehiago" eman behar zaizkiola aldarrikatzeko eta subiranotasun horrek euskal herritar guztien eskubide guztiak bermatzeko balio behar duela azpimarratzeko.

Ekitaldian, Jose Antonio Agirre lehendakariaren belaunaldia gogoratu dute, Getxoko alkate ohia eta EAEko lehen Estatutuaren onarpenean giltzarri izan zen, eta dozenaka lagunek parte hartu dute. Horien artean izan dira Oier Errementeria Gure Eskuren izenean, Helena Franco Ibarzabal EHUko irakaslea eta Xabier Agirre Arizmendi, lehen lehendakariaren iloba. Bertan izan dira ere Iñaki Zarraoa alkate ohia, Arantza Itsasmendi abokatua, Imanol Goirigolzarri EAJko kidea, Paul Laka Sortuko Bizkaiko arduraduna eta tokiko EH Bilduko hainbat zinegotzi, besteak beste.

Bere hitzartzean, Agirreren belaunaldiak utzitako ondarea azpimarratu du Gure Eskuko bozeramaileak: "Pertsona haiek herria eta herritarren eskubideak jarri zituzten haien interesen gainetik. Eta haiengandik hiru ideia nagusi jaso ditugu: duintasuna, gorrotoaren arbuioa eta itxaropena".

"Hitzetatik ekintzetara pasatzeko garaia da"

"Hitzetatik ekintzetara pasatzeko garaia da. Erabakitzen hasteko garaia da", esan du Helena Franco EHUko irakasleak, eta subiranotasun handiagoa behar dela hausnartu du. Gogoratu duenez, "Euskal Herria zazpi lurraldez osatutako nazioa da", eta historian zehar bere burua gobernatzeko hainbat bide bilatu eta garatu dituela. Horregatik, bere ustez, herrialdeak "erabakitzeko ahalmen handiagoa" behar du, “euskal herritar ororentzat bizimodu duin bat bermatuta”.

Francok azpimarratu du Ipar Euskal Herria, Nafarroa eta Euskal Autonomia Erkidegoa autogobernuan aurrera egiteko dinamika ezberdinetan murgilduta daudela, eta beste pauso bat ematea eskatu du: "Hitzetatik ekintzetara pasatzeko garaia da. Jar dezagun herria, jar ditzagun herritarrak, norberaren interesen gainetik eta aukera aprobetxa dezagun. Helburu argi batekin: burujabetza handiagoa, Euskal Herri kohesionatuagoa eta, finean, herri libre baten eraikuntza".

Subiranotasuna eta eskubideak

1993ko erreferendumean emakumeek lehen aldiz bozkatu ahal izan zutela gogoratu dute, eta Gure Eskuk aukera baliatu du subiranotasuna eta autogobernua herritarren eskubideekin lotzeko.

Jose Antonio Agirre Estatutuaren bultzatzaileetako bat izan zen, eta ilobak, Xabier Agirrek, itxaropenerako deia egin du egungo testuinguruaren aurrean, autogobernua eta subiranotasuna jendeari bizitza duina bermatzeko funtsezko tresnak direla ziurtatuz. "Ziur gaude horretaz".

Agirrek gogora ekarri du, gainera, osabaren gogoeta bat, 1949an idatzitakoa: "Ez da ulertzen Europa hau bakean, eta bere ordena propioarekin, gizakiak eta herriak bertan preso baldin badaude". Horrez gain, konpromiso partekatua berretsi du: "Geure aniztasunetik eta geure eguneroko lanaz, herritar librez osaturiko herri librea eraikiko dugu".