Euskadik aireportuen kudeaketan parte hartuko du, lehendakariak Pedro Sanchezekin adostu ostean

Euskadik “aireportuen kudeaketan parte hartu” ahal izango du, Aldebiko Aireportu Organo berri baten bidez. Hori da Imanol Pradales lehendakariaren eta Pedro Sanchez presidentearen bileratik ateratako albiste nagusietako bat. Adostutakoari esker, Jaurlaritzak “erabaki garrantzitsuetan eragiteko gaitasuna” izango du.

Bilerak, halaber, bestelako akordioak ere ekarri ditu, hala nola herritarren segurtasuna hobetzekoak eta industria arloko enpresa ertain eta txikiei laguntzeko neurriak.

Bileraren amaieran, Imanol Pradales lehendakariak azpimarratu du Euskadik parte hartuko duela Loiuko, Hondarribiko eta Forondako “aireportuen arloko erabaki estrategikoen definizioan eta orientazioan”.

Era berean, Jaurlaritzatik adierazi dutenez, akordioak “Euskadin kokatutako aireportu-azpiegituren gaineko kudeaketa partekatuaren esparrua ezartzea” ahalbidetzen du.

Eusko Jaurlaritzak nabarmendu du Euskadik “erabaki estrategikoetan eragiteko gaitasuna” izango duela, hala nola plan zuzendarietan, Aireportuen Arautze Dokumentuan, inbertsioetan eta tarifetan.

Halaber, Eusko Jaurlaritzak “sistemaren garapenean eta konektibitatean jarduteko gaitasuna” izango du; horrela, “lurraldearen aireko konektibitate beharrak ebaluatzen” eta “ibilbide berriak sustatzen” parte hartuko du.

Lehendakariak, gainera, adierazi du Euskadik parte hartu ahal izango duela “aireportuen eta beste garraio publikoen arteko lotura bultzatzen”.

Azkenik, aireportuen arloko akordioak jasotzen du “Gasteizko aireportuan sandbox arautzaile bat ezartzea”. Helburua da Forondako aireportua “konektibitatea, intermodalitatea eta lurraldearen garapen ekonomikoa hobetzeko proba-ingurune bihurtzea”.

Beste sei akordio

Aireportuen arloko akordio honetatik harago, beste sei lerrotan ere lankidetza hitzartu dute.

• Herritarren segurtasunari dagokionez, delituak errepikatzen dituztenen kasuetan aplikatu beharreko zigorrak gogortzea adostu dute.
• Espainiako Kreditu Ofizialeko Institutuaren eta Finantzen Euskal Institutuaren arteko lankidetzarako esparru, enpresei eta interes ekonomiko eta sozialeko beste proiektuei laguntzeko eta errazago finantzatzeko.
• Nekazaritzako aseguru konbinatuentzako dirulaguntzen eta ekoizleen informazioaren kudeaketaren eskualdatzea.
• Arrantzari dagokionez, EAEren esku geratu da barruko eta kanpoko uretan dauden ontzien zaintza, ikuskapena eta kontrola.
• Trafikoari eta gidabaimenei dagokienez, azterketa medikoak eta berreziketak egiten dituzten zentroen eskumena transferitzea adostu dute.
• Segurtasun pribatuaren arloan, lankidetzan aurrera egitea hitzartu dute.