Epaileak Jose Luis Rodriguez Zapatero inputatu du Plus Ultra auzian, eta dirua zuritzeagatik ikertuko du

Jose Luis Calama Auzitegi Nazionaleko epaileak Jose Luis Rodriguez Zapatero Espainiako Gobernuko presidente ohia ikertzea erabaki du Plus Ultra auzian, influentzia trafikoaren ustezko delituagatik eta erakunde kriminal gisa beste delitu batzuekin lotura izan dezakeelakoan.

Espainiako Gobernuak Plus Ultra airelineari pandemian zehar erreskate moduan eman zizkion 53 milioi euroak modu irregularrean erabili ote ziren ikertzen ari da epailea.

Kapitalen zuriketa ustezko delitu baten harira abiatu zuen epalieak Plus Ultra auzia eta, orain, inputatu gisa deklaratzera deitu du Zapatero, ekainaren 2an.

Autoan dioenez, "legez kanpoko influentzia-sare antolatu bat dago, bera (Zapatero) buru duena", eta horren helburua da "onura ekonomikoak lortzea, bitartekaritzaren bidez eta instantzia publikoetan hirugarrenen alde jokatuz, batez ere Plus Ultraren alde", ustez, Kaudimen Funtsaren esparruan airelinearentzako 53 milioi euroko laguntza publikoa onartzera bideratuta. 

Zapaterok eta ingurukoek eskuratutako mozkinak 1,9 milioikoak izan diatezkeela dio epaileak autoan, hainbat enpresaren artean banatuta.

Auzi horretan, erakunde kriminalaren, influentzia-trafikoaren, dokumentuak faltsutzearen eta kapitalak zuritzearen ustezko delituak ere ikertzen ari da epailea, emandako laguntzak nola erabili ziren argitzeko. 

Instrukzioak zabalik jarraitzen du Auzitegi Nazionalean, eta sumarioaren sekretua kendu dute.

Joan den abenduan, ikerketa horren esparruan, Plus Ultraren presidente Julio Martínez, CEO Roberto Roselli eta enpresaburu Julio Martínez Martínez atxilotu zituzten, Madrilgo Instrukzioko 15 zenbakiko Epaitegiaren aginduz, eta horrek auzia Auzitegi Nazionalera bideratu zuen.

ZURE INTERESEKOA IZAN DAITEKE:  Zer da Plus Ultra auzia eta zer lotura du, ustez, Zapaterorekin? 

Epaileak baztertu egin zuen Zapateroren etxea miatzea

Calama epaileak uko egin zion Jose Luis Rodriguez Zapatero Espainiako Gobernuko presidente ohiaren etxebizitza partikularra miatzeari, Poliziak eskatu bezala, ez baitu uste Plus Ultra airelineari emandako maileguaren inguruko ustezko eragin-trafikoaren frogarik bertan egon daitekeenik. 

Magistratuaren ustez prozedura judizialaren "hedapen mediatiko handia" tarteko, "zentzuz uste izatekoa da egon izan litekeen edozein elementu inkriminatzaile dagoeneko erretiratua, suntsitua edo lekualdatua izango zela, eta horrek ahuldu egiten du eskatutako neurri murriztailearen proportzionaltasuna eta beharra". 

Epailearen arabera, etxea erregistratzeak, gainera, auzipetuaren oinarrizko eskubideei maila "bereziki handian" eragingo lieke "ez bakarrik eremu pribatua delako, baita titularraren posizio instituzionalagatik ere,  epailearen iritziz, "pribatutasunaren eta segurtasun pertsonalaren ikuspegitik bereziki sentikorra den eremua baita" haren helbidea. 

"Horren aurrean, etxebizitza miatzeak ikerketarako ekar lezakeen onura potentziala zalantzazkoa eta hipotetikoa da, ez baitago froga-elementu garrantzitsuak lortzea aurreikusteko motiborik. Bi planoen arteko desproportzioa agerikoa da", gaineratu du.

Plus Ultraren aldeko gestiorik "inoiz" egin ez duela ziurtatu du Zapaterok

Inputazioaren berri izan ostean, astearte honetan bertan, Jose Luis Rodriguez Zapatero Gobernuko presidente ohiak ziurtatu du ez duela “inoiz ere” gestiorik egin administrazio publiko edo sektore publiko baten aurrean Plus Ultra airelinearen erreskatearen alde.

"Nire jarduera publiko eta pribatu guztia legea erabat errespetatuz egin da beti", azpimarratu du.

Martxoaren hasieran, Zapaterok Senatuko batzordean hitz egin zuen, Koldo kasuaren harira, eta bertan, ukatu egin zuen airelineari emandako laguntzarekin zerikusirik izan zuela. Gainera, bere aholkularitza-lan guztiak legezkoak zirela eta zerga-betebehar guztiak bete egiten dituela adierazi du.

Goi ganberan azaldu zuenez, Analisis Relevanterako –Plus Ultraren bezeroa– aholkularitza politiko lan bat egin zuen, eta 70.000 euro gordin kobratu zituen urtean, faktura bidez eta PFEZ eta guzti. Azaldu zuenez, komunikazioa eta marketina alabek duten sei langileko enpresa txikiak egin zizkion, eta horrek ez du inoiz administrazio publikorako lan egiten, ziurtatu duenez. 

Nolanahi ere, justiziari laguntzeko prest agertu da, "noski".