Ramon Rubial sariek UGT eta CCOO sindikatuen lana aitortu dute

UGT eta CCOO sindikatuek jaso dute Ramon Rubial Fundazioak ematen duen Demokraziaren eta Askatasunaren Defentsaren saria, "langileen eskubideen eta Espainiako balio demokratikoen alde etengabe egindako lanagatik", eta Eneko Andueza PSE-EEko idazkari nagusiaren eskutik jaso dute Unai Sordok (CCOO) eta Pepe Alvarezek (UGT) saria. 

Saria jasotakoan, Alvarezek askatasuna eta demokrazia "berdintasunetik" defendatzeko beharra azpimarratu du. Izan ere, "horrela egin ezean, lehenengo bietatik bat bera ere ez da izango ez benetakoa, ez eraginkorra ere". Bere hitzaldian, Eduardo López Albizu "Lalo" eta Nicolás Redondo euskal buruzagi sozialista eta sindikalisten ondarea nabarmendu du Alvarezek. Unai Sordok, bere aldetik, demokrazia defendatu du, "ez bakarrik hautaketa sistema formalista gisa", "eskubide kolektiboen eta aukera-berdintasunaren multzo" gisa baizik. Egungo ziurgabetasun sozialak gorabehera, Ramon Rubialen erresistentzia eta borroka ereduak ez duela "ezkortasunerako eskubiderik" uzten gaineratu du. 

Aurre egiteko prest

Sari banaketan, Anduezak gaineratu du "gehiengo soziala" prest dagoela diskurtso populisten eta eskuinaren eta ultraeskuinaren aliantzaren aurrean "aurre egiteko eta irabazteko", eta erantsi duenez, "garaia da progresismoaren, ezkerreko politiken eta pertsonen bizitza hobetzeko eta justizia sozialaren alde borrokatzeko ahaleginen papera aldarrikatzeko".

Era berean, Ramon Rubial buruzagi historikoa gogoratu du. Horren hitzetan, hura "ez zen nekatu guztion eskubideen alde, diktaduraren aurka eta herrialde honetara askatasunak itzuliko lituzkeen trantsizio baten alde egindako borrokan", eta egungo sozialismoa ere ez dela bide horretan aurrera egiten nekatuko erantsi du.

"Berezko argia duten balioak" lelopean, Almudena Ariza kazetariaren lana ere saritu dute Ramon Rubial sarien XIX. edizioan. Halaber, UMEk Elkartasun eta Lankidetzaren saria jaso du, eta Iratxe García Europako Parlamentuko Talde Sozialistaren arduradunak Balio Sozialisten Defentsaren saria jaso du.

Ramon Rubial Sarien XIX. edizioko irabazleak

• Elkartasunaren eta Lankidetzaren Ramon Rubial saria: Larrialdietarako Unitate Militarra (UME).
• Kirolaren Ramon Rubial saria: Deportiva Nautica Portugalete kluba.
• Kulturaren Ramon Rubial saria: Ezezagunok.
• Enpresaren Ramon Rubial saria: Cidetek.
• Euskadi Munduan Sustatzeko Ramon Rubial saria: Magialdia.
• Komunikazioaren Ramon Rubial saria: Almudena Ariza.
• Iraunkortasun eta Ingurumenaren Defentsaren Ramon Rubial saria: Lurgaia Fundazioa.
• Demokraziaren eta Askatasunaren Defentsaren Ramon Rubial saria: UGT eta CCOO.
• Balore Sozialisten Defentsaren Ramon Rubial saria: Iratxe Garcia.