Kataluniak 1 eta 3 euro arteko turismo-tasa ezarri du

Kataluniara doazen turistek tasa berri bat ordaindu beharko dute. Hoteletan, apartamentuetan, nekazal etxeetan eta itsas bidaietan aritzen direnek 1 eta 3 euro artean ordaindu beharko dituzte, establezimenduaren kategoriaren arabera.

Tasa hori pertsona bakoitzak ordaindu beharko du. Bost izarreko hoteletan 3 euro ordaindu beharko dituzte gau bakoitzeko; lau izarretakoetan, bi euro; eta gainerakoetan euro bat ordaindu beharko dute.

Gehienez hamar gau ezarri dira tasa hori ordaintzeko; epe hori gainditzen bada ez da ordainduko. Neurri horrekin 100 milioi euro biltzea espero du Kataluniako Gobernuak, Andreu Mas-Colell Ekonomia kontseilariak 2012ko Generalitateko aurrekontuen aurkezpenean jakinarazi duenez.

Kontseilariak azaldu duenez, turista guztiek ordaindu beharko dute tasa hori, Espainiakoek zein atzerrikoek; izan ere, atzerritarrentzako tasa jartzekotan "Europako araudiak urratuko" lituzkete.

Mas-Colellen hitzetan, tasa hori, besteak beste, Erroman edo Parisen ordaintzen da, eta biltzen duten dirua turismoaren sektorean inbertituko dutela iragarri du.

Bestalde, kataluniar guztiek euro bat ordaindu beharko dute medikuaren errezeta bakoitzeko. Neurri horrekin 102 milioi euro biltzea espero dute.

Oraingoz tasa hori guztientzat izango da, baina baliteke urtean zehar irizpidea aldatzea, eta zenbait taldek ordaindu behar ez izatea.

Mas-Colellen hitzetan, "errentaren arabera ordaintzea zaila da".

"Nahiago dugu maila baxutik hastea" eta euro bat ordaintzea bisita bakoitzeko; eta ondoren erabakiko dute talderen batek ordaindu behar ez duen, esan du kontseilariak prentsaurrekoan.

Farmatziek jasoko dute euro hori, eta kontseilariaren esanetan, neurri horrek ez du dirua biltzeko asmorik, "medikuaren gehiegizko erabilera saihestu nahi dute" neurriarekin.